Şaristanê Zurihî yê Swîsre de polîsan hêrişê çalakîya 8ê Adare ya cinîyan kerd ke Têgêrayîşê Cinîyan ê Kurdan pê kincanê tradîsyonelan zî tewrê ci bibî. Polîsan dormeyê meydanî girewt la cinîyî derbazê meydanê bîyî.

Polîsan verî gef wend û dima zî hêrişê cinîyan kerd. Polîsan Endama Meclîsê Cinîyan ê Kurdan ê Zurihî Şehnaze Kaya zî tede xeylêk cinîyî destbend kerdî. Polîsan cinîyî erdî ra kaş kerdî, destê înan kelemçe kerdî û gaz verda cinîyan ser.

Rixmê nê hêriş û astengîyan zî cinîyan dest pê rayraşîyayîşî kerd. Polîsan reyna rayîr girewt û cinîyan pê sloganan polîsî şermezar kerdî. Cinîyan pê çepik û sloganan çalakîya xo qedînaye.