Têgêrayîşê Azadîye yê Cinîyan ê Êzidîyan (TAJÊ) vera hêrişê dewleta tirke yê serê dewa Sikênîyê ya Şingalî nêrazîbîyayîşê xo mojna.

TAJÊ da zanayene ke nêbeno ke vera qirkerdişê dewleta tirke merdimî bêveng bimanê û vat: ''Ma venga pêro dinya danê ke wa vengê ma bieşnawa. Ewro nêweşxaneyo ke tede domanê 10 serrî, nêweşê Korona û îxtîyarî estbîy hetê teyarayanê Erdoganî ra reyna dîya bombayan ver. Wa dinya Erdoganî û hemkaranê ci vindarna.

Wa bizanê; adir zî ma ser de bivarnê, bombayan zî bixebitnê ma înan ra nêtersenê. Ma do qetî milê xo çewt nêkerê, heta peynî xo ver bidê. Iraq û Mesûd Barzanî paştî danê Erdoganî. Înan de ne şeref, ne namus ne zî rûmet esto. Dewleta Iraqî çira ma nêpawena? Saete bîya çend ma hema zî domananê xo binê enkazê kerrayan ra vejenê. Ma do hînî rayîr nêdê fermananê bînan. Eke dewleta Iraq ma nêpawa wa tîya ra şora. Wa dişmen hol bizano ke ma ne înan ne zî dewleta Iraqî qebul kenê.''

Eşkerayîye pê slogananê 'Şehîdî nêmirenî' qedîyaye.