Hêrişê dewleta tirke ya îşxalkere yê vera Şingalî dewam kenê. Vizêr saetanê şanî de îşxakeran dewa Barê ya Şingalî de hêrişê nuqtayêka asayîşî kerd. Hêriş de kesêk birîndar bi. Têgêrayîşê Azadîye yê Cinîyan ê Êzidîyan (TAJÊ) vera hêrişan nêrazîbîyayîş ramojna.

Eşkerayîye de bale ameye sere antene ke dewleta tirke wazenê pê nê hêrişan êzidîyan bitersno û ame vatene ke şarê êzidîyan rixmê heme hêrişan do çirey peyser game meerzo.

TAJÊ vat: ''Dewleta tirke çend hêriş bikero ma zî do hendê xover bidê, têkoşîn bikerê û rêxistinkerdişê xo pîl bikerê. Ma dewleta tirke û hemkaranê ci ra nêtersenê. Se kenê wa bikerê ma do çirey  verê înan de milê xo çewt nêkerê. Nê hêrişî pê planê keyeyê Barzanî û dewleta tirke benê. Ma do vera nê hêrişan heta peynî xover bidê û herra xo canêverdê. Ma do heta peynî reçê şehîdanê xo de şirê. Herra ma ya bimbareka ke pê gonîya şehîdanê ma bîya azade ma do dişmenê xo yê gonîwerî rê meverdê. Înanê ke ma caverdayî û remayî cayê înan tîya çîn o. Ma do reyna destur nêdo ke herra ma bêro îşxalkerdene.''