Vervatoxa Meclîsê Cinîyan a HDPyî Dîlane Dîrayet Taşdemîr merkezê partîye de kombîyayîşêkê çapemenîye kerd û rojdem ercna.

Beşêkê ercnayîşê Taşdemîrê wina yê:

''Tepişteyê Nêweşî

Ganî cade seba tepişteyanê neweşan xebatê cidîyî bêrê kerdene. Tepişteyê nêweşî hem nênê weşkerdene hem zî yenê cezakerdene; cezaya hucreyî yena dayene înan û înfazê înan bi cezayanê keyfîyan yenê xirabkerdene. Ganî tepişteyê nêweşî cade bêrê veradayene.

Roniştişê Kişanake û Tuncele 

Embazê ma Kişanake û Tuncele hîrê serrî yo ke tepişte yê. Bi rayîrê SEGBÎSî yo ke sîstemêko bêhuqûqî yo cezaya 15 serran ameye dayene înan. Dima mehkemeya îtîrafî na ceza red kerde û roniştiş newe ra dest pêkerd. Serekê AKPyî  wekîlanê ma, hemserekanê ma bi vatişanê bêbingeyan sûcdar keno. La a raştîye ê mehkemeyan de nasnameyê ma, raştîye, polîtîkaya embazanê ma û cinîyî yenê hukmkerdene.

Îstîsmar û Vînkerdişî

Dêrsim de cinîyêka bi nameyê Gulîstan Doku 12 rojan ra nata vînbîyaye ya. Ma şîyî Dêrsim ke serebût teqîb bikerê û ma dî ke Dêrsim de derheqê na babete de çîyî yenê nimitene. Yeno waştene ke no serebût bêro normalîzekerdene. Reyna Dêrsim de camêrdê bi nameyê Harun Yildirim 15 domanan rê îstîsmar kerd. Verê cû Cizre de, Çewlîg de, Mêrdîn de serebûtê îstîsmarî amebî meydan. La derheqê nê pêro serebûtan de bira bêteqîbîye ameye dayene. Zanîngehî hînî bîyî cayê îstîsmaran.

Qanûnê îstîsmarê cînsî amebi rojdemê meclîsî. La seba ke rêxistinanê cinîyan vera ci nêrazîbîyayîşê xo mojna neçare mendî ke qanûn apey bigêrê. Zewijnayîşê bi tecawuzkeran sûcê vera merdimîye û komelî yo. AKP wazeno no sûc bibo qanûn. Tecawuzê domanan keno bêsûc. Bi nê hawayî AKP wazeno ke serê  îstîsmaran û tecawuzan bêro padayene.18 serran de Tirkîya de 1800 cinîyî ameyî qetilkerdene û îstîsmarkerdene. Destkewteyê cinîyan yenê hedefkerdene. Anqara de 7 embazê ma yê cinîyî ameyî destbendkerdene.

Konferansê Cinîyan

Ma do sey HDP 18-19ê çeleyî de konferansê cinîyan serûber bikerê. Konferans bi tewrbîyayîşê 400 delegeyan 2 rojan dewam bikero. Ma sey Meclîsê Cinîyan ê HDPyî muneqeşa bikerê ke ma senî nê meseleyanê cinîyan çareser bikerê. Ma vera na polîtîkaya çinkerdişî hêvîya xo pîl bikerê. Cinîyî do rayberîya vurîyayîşan bikerê. Ma do bi têkoşînê hemparî waranê cinîyan awan bikerê û têkoşînê xo berz bikerê."