Wan de tecawuz û tacîzê ke qoricîyî cinîyan rê kenê, bêceza yenê verdayene. 6 serebûtanê tecawuzî de teyna qoricîyêk ame cezakerdene, qoricîyê tecawuzkerî yê bînî wextêk tepişte mendî la dima vera dîyayî. Aktîvîsta heqanê cinîyan Zozane Ozgokçe derheqê babete de ANFyî rê qisey kerd.

Zozane pare kerd ke hêrişê cînsîyî (tacîz û tecawuzî) sey metodêkî bi destê hêzanê paramîlîteran, qoricîyan û selahîyetdaranê burokrasî hetê dewlete ra yenê kerdene. Zozane dîyar kerd ke nê hêrişê cînsîyî polîtîkayê mîlîtarîstî yê û vat: ''Serranê 90an de zî wina bi. Serranê 90an û 2000an de zîndanan de vera bedenê cinîya kurde tedaya psîkolojîke, fîzîkî û cînsîye ameye kerdene. Çar parçeyanê Kurdîstanî de zî rewşe wina ya. Hêzê taybetî yê Saddamî bi 'herimnayîşê şerefê cinîyan ê kurdan' ameybî erkdarkerdene.''

Zozane Ozgokçe serebûtê N.Ç. yê 2002yî vist vîrî û vat: ''Nê serebûtî de tecawuz hetê qoricî, hêzanê asayîşî ameybî kerdene. Serebûtê winayênî tim qewimîyenê û yenê nimnayene. Serebûtê N.Ç. de zî çew nêame tepiştene. Wextê peyênî de tecawuzê ke hetê qoricîyan ra yenê kerdene zêdîyayî. Ma kenê ke nê serebûtan bivisnê rojdemî. La qoricîyî nêtepişîyenê û tedbîrêko huqûqî nêno girewtene. Domanê ke raştê tecawuzî yenê, 'waştişê înan' û 'kênabîyayîşê înan' cigêrîyeno. Xeylêk serebûtê tecawuzî est ê ke cinîyan rê yenê kerdene la teyna ewnîyeno keynabîyayîşê înan. Qoricîyî yan zî lajê ci wazenê bizewijê la eke keyeyê keyna nêwazê hetê nînan ra keye raştê tedayan yeno. Merdimî sîstemê qoricîtîye ra neçare manenê ke koç bikerê. Heyf ke cinîyê kurdî hîna zaf mexdûr benê. Ganî na babete ser o her kes bi hîsgerî têbigêro.''

Zozane Ozgokçe îfade kerd ke akademîsyenê kurdî, rêxistinê komelê sivîlî, rojnameger, aktîvîstê heqanê merdiman ganî karêkê cidîyî bikerê û vat: ''Na babete de ganî ma sey şarê kurdî zanaye bikerê. Ganî keyeyî domananê xo bipaqê. Qoricîyê ke rayîr û metodanê winayênan şuxilnenê wazenê domananê xo bidê zewijnayene la wexto ke nêeşkenê ney bikerê hînî dest pê tecawuz û tacîzî kenê. Wexto ke xizanîye zî est ba hînî komel bêçare yeno verdayene.''