Endama Meclîsê Cinîyan ê HDPyî Bedrîye Tekgur ANFyî rê qisey kerd û da zanayene ke wextê îqtîdarê AKPyî de teda û şîdetê vera cinîyan zêdîyayê.

Tekgure îfade kerd ke îqtîdarê AKP-MHPyî bi destvistişê waranê cinîyan û keyeyan de hepskerdişê înan wazeno 'cinîya mehqule' biaferno û vat: ''Ziwan, xîtan û vateyê îqtîdarî hêzî danê camêrdan. Nika camêrdî bi rehetî eşkenê vajê 'Ez do to bikişa û tewr tewr 2 mengan zîndan de bimana.' Dadgerî goreyê fikrê sîyasî yê hukmatî qanûnan şuxilnenê. Wextê janî de kiştoxê cinîyan vera dîyayî, şewêke Peymana Îstanbulî ameye betalkerdene. Kiştoxê Pinare Gultekîne vat 'hol o ke Serekkomarê ma Peymana Îstanbulî wedarita.'  ''

Tekgure ard ziwan ke warê têkoşînî yo ke îtîfaqê AKP-MHPyî tewr zaf tira terseno têkoşînê cinîyan û vat: ''Têkoşînê cinîyan nêno vindarnayene. Cinîyî do apey gamêke nêerzê. Ê seba ke cinîyan ra tersenê dezgehê cinîyan qefilnenê, hêrişê têkoşînê dadîyanê tepişteyan kenê, serkêşê têkoşînê cinîyan ê kurdan tepişenê, Taksîm Mayanê Şemeyî rê qedexe kenê. Ê zanenê e cinîyî qetî do têkoşînê xo ra û waştişê edalet û heqan ra fek vera nêdê. Ê cinîyan ra tersenê û wa bitersê. Têkoşînê cinîyan do cuya azade, têdûşte û hempare bîyaro.''