Vera xespanê qeyûman nêrazîbîyayîşî dewam kenê. Hemsereka Şaredarîya Perî Songule Dogan, Endama Meclîsê Şaredarîya Perî Narîne Gunay û Hemsereka HDPyî ya Dêrsimî Ozleme Toprak derheqê xespanê qeyûman de PÎRHA reyde qisey kerd.

Songule Dogan vat ke: "Tedaya vera hemserekîya ma dewam kena. Hemserekîye û temslîmîyeto seypê xetê ma yê mor ê. Têkoşînê ma do dewam biko. Qeyûmî do nêeşkê îradeyê ma bişiknê, ma do dewam bikê ke xizmetê şarê xo bikê. Şaredarîye bîye qereqol. Leşkerî şarê ma, wendekaran bi vatişanê xo ecîz kenê. Ma do îtaat nêkê. Ma do çalakîyanê roniştişî dewam bikê."

Hemsereka HDPyî ya Dêrsimî Ozleme Toprak îfade kerd ke îradeyê şarî yeno xespkerdene û vat: "Ma naye qebul nêkenê. Ma îtaatê faşîzmê AKP-MHPyî nêkenê. Hemserekanê ma bêteblîgatî û bê birrêke bihawayêkê îlegalî wezîfeyanê xo ra ameyî girewtene. Ma do vera qeyûman milê xo nêarê war, ma do têkoşînê xo dewam bikê û ma do bi xoverdayîşî ser bikewê."

Endama Meclîsê Şaredarîya Perî Narîne Gunay vat: "Ma şaredarîye sey şarî girewte û ma do sey şarî wayîrê ci bivejîyê. Ma do qeyûman bin bifîne,  têkoşînê xo dewam bikê û şorê dewanê xo ke goş bidê şarê xo ser. Ma do bi hawayêkê fîîlî karê xo dewam bikê."