Têgêrayîşê Cinîyan ê Azadan (TJA) Salona Dawetî ya Labella ya Şîşlî de bi şîarê ''Vera faşîzmî û qirkerdişê cinîyan wext wextê azadîya cinîyan o'' deklarasyonê 25ê Teşrîna Peyêne Roja Têkoşînê Vera Şîdetê Serê Cinîyan eşkera kerd. Salone de fotografê Sakîne Cansiz, Fîdan Dogan, Leyla Şaylemez, Sêvê Demîr, Pakîze Nayir, Fatma Uyar, Nagîhane Akarsel, Jîna Amînî, Garibe Gezer, Pinare Gultekîn, Hevrîne Xelef û Kadere Ortakaya ameyî daliqnayene.

Vervatoxa Meclîsê Cinîyan ê HDPyî Ayşe Acar Başaran, Wekîlê HDPyî Gulistane Kiliç Koçyîgît, Fatma Kurtulan, Şevîne Coşkun, endamê Înîsîyatîfê Mayanê Haştîye, çalakîkerê Nobeta Edaletî û bi seyan cinîyî beşdarê bernameyî bîyî. Aktîvîsta TJA Feleke Erdem deklarasyon wend.

Deklarasyon de ame vatene ke felsefeya 'jin, jiyan, azadî' Kurdîstanî ra vilayê her cayî bena. Deklarasyon de ame parekerdene ke cinîyî raştê şîdetê camêrdan û dewlete yenê. TJA bale ante kerdişanê xiraban ê vera tepişteyan ser û venga her kesî da ke nobetanê edaletî de cabigêrê û paştî bidê keyeyanê tepişteyan.

TJA deklarasyonê xo de hêrişê kîmyewî zî şermezar kerdî û vat: ''Nê hêrişî hêrişê vera cinîyan û têkoşînê azadîya cinîyan ra cîya nîyê. Şexsê Şebneme Korur Fîncanci de vera nê hêrişan tewirmojnayîşî meseleya rûmetî ya. Ma sey TJA venga pêro dezgehan, rayaumûmîye û rêxistinan danê ke vera nê şerî vengê xo berz bikerê.''

TJA îfade kerd ke kultur û ziwanê cinîyan ê kurdan hedefê hêrişan de yê û vat: ''Ma soz danê ke vera hişmendîya qedexeker, tekperest û kolonyalîste her wextî ra zêdeyêr ziwan û kulturê xo bipawê, wayîrê înan vejîyê. Erkê ma yo ke ma wayîrê qelema cinîyan ê rojnamegeran ê tepişteyan vejîyê.

TJA bale ante şîdetê unîformakerdeyan ser û vist vîrî ke şexsê Îpeke Er, Gulîstane Doku, Pinare Gultekîn de cinîyî pê polîtîkayanê şerê taybeyî bênasname verdîyenêç TJA vat: ''Ma soz danê ke perspektîfê jineolojî ser o vera polîtîkayanê şerê taybetî têkoşînê xo xurtêr bikerê.''

TJA deklarasyonê xo de serewedaritişê cinîyanê Rojhelatê Kurdîstanî û Îranî selam kerd û vat ke ê hetê nê serewedaritişî de yê.

TJA pê hesna ke muxatabo verên ê çareserîya meseleya kurdan Rayberê Şarê Kurdî Abdullah Ocalanî yo û waşt ke tecrîdê Îmraliyî cade bêro wedaritene.

TJA peynîya deklarasyonî de venga pêro cinîyan da ke 25ê Teşrîna Peyêne de têkoşîn û xoverdayîşî geş bikerê û vat: ''Sozê ma yo ke çew do nêeşko verê têkoşînê azadîye yê cinîyan bigêro.''

Destpêkê Bernameyê 25ê Teşrîna Peyêne yê TJA wina yo:

-11ê teşrîna peyêne de Nagîhane Akarsel Anqara de do bêra yadkerdene.

-12ê teşrîna peyêne de qezaya Qelqelî ya Wanî de serewedaritişê cinîyanê Îran û Rojhelatê Kurdîstanî do bêro selamkerdene. Qezaya Qilebanî ya Şirnexî de zî vera polîtîkayanê şerê taybetî çalakîyêke do bêra kerdene.

Eşkerakerdişê deklarasyonî ra dima cinîyan dowîzê bi nuşteyê 'Çekê kîmyewî sûcê merdimîye yê' akerdî û derheqê têkoşînê cinîyan de sînevîzyonêk ame mojnayene.