TJA derheqê îstîsmarkerdişê cinî û domanan û kiştişê cinîyan de eşkerayîyêka nuştekîye weşanaye.

Eşkerayîye de ame vatene, “Şîdetê vera cinîyan problemêko giran û hîra yo” û îşaret bi doneyanê raporanê dewlete ame kerdene. TJA da zanayene, goreyê raporanê dewlete û doneyanê raporanê ke fermî nîyê, problemêk resto merheleya xeylî girane û ame vatene, panc menganê destpêkî yê serra 2019’î de 200 zêdeyî cinîyî ameyî kiştene. Eşkerayîye de ame vîrardene, Mehkemeya Berze cezaya muebedî ya ke Nevîn Yildirime rê birnabî tesdîq kerde û avûkate Muzeyyen Îslî rixmê qerarê pawitişî zî hetê hemserê aye yo ke merheleya cîyabîyayîşî de bîyî, ameye kiştene.

Hetê bînî ra ame vatene, Riha de vergumano ke hîrê domanî îstîsmar kerdê bi hawayêko nêgirewte ame muhakemekerdene û da zanayene, bi polîtîkaya bêcezabirnayîşî vernîya şîdetê vera cinî û domanan yena akerdene. TJA da zanayene, ê do destkewtîyanê cinîyan ra wayîr bivejîyê û ame vatene, “Ma do rayîr nêdê tarîtîya ke şima cehd kenê ke biafernaye. Rixmê polîtîkayanê şima yê heme bêvengkerdişan ma do bi vengêkê berzî biqîrê. Bi şîyarê ‘cimato azad bi cinîyanê azadan beno’ ma do têkoşînê xo her ware de xurt bikerê.”