Têgêrayîşê Cinîyan ê Kurdan ê  Ewropa  (TJK-E) 25ê Teşrîna Peyêne de Roja Têkoşînê Vera Şîdetê Serê Cinîyan  semedê cinîyan ê ke wextê îqtîdarê Serekkomarê Tirkî Tayîp Erdoganî  ameyî qetilkerdene, Kampanyaya '100 Sebeb û 100 Îmzayê Seba Muhakemekerdişê Dîktatorî' dayebî destpêkerdene.

TJK-E merheleya verên a kampanyaya xo ya ke çar aşmî yo domnena bajarê Zurihî yê Swîsre pê kombîyayîşê çapemenîye da eşnawitene. Eşkerayîya bi nameyê TJK-E hetê Neslîhane Kiliç ra ameye wendene de nê ameyî vatene:

''Kampanyaya ma ye ke bi serkewtişî ameyî domnayene kewte merheleyêke newîye. Vera sîyasetê îmha û înkarî yê rejîmê AKP-MHPyî û heme hêrişanê dewlete de cinîyê kurdî timûtim bi vengê berzî qîrênê. Cinîyan vera dîktatorîya Erdoganî çirey peyser game nêeşte. Ma zî sey Têgêrayîşê Cinîyan ê Kurdan ê Ewropa wayîrê  nê xoverdayîşê tarîxî yê cinîyan vejîyayî.

Çarçewa Kampanyaya '100 Sebeb û 100 Îmzayê Seba Muhakemekerdişê Dîktatorî'  de 235 hezar û 727 îmazayî ameyî arêdayene.  Ma do bi nê îmzayan pîya bi dosyaya ke sûcê Erdoganî tede yê muracatê Neteweyanê Yewbîyayeyan û dezgehanê mîyanneteweyî bikerê.

Dîktator Erdogan bi vatişanê xo yê polîtîkan, talîmat û qerarnameyê ke îmza kerdî sere de cinî û domanî Tirkîya, Vakur, Rojawan û Başûrê Kurdîstanî, Şingal û Mexmûr de sûcê ke vera komelî  benê ra dîrek mesuldar o. Coka ganî goreyê huqûqê mîyanneteweyî sûcanê sey qetilkerdişê cinîyan û domanan, îşkence, destsernayîş, tacîz û tecawuzî ra bêro muhakemekerdene. Seba ke huqûqê mîyannetweyî heta nika vera sûcanê Erdoganî bêveng mend no semedê tarîxê merdimîye û edaletî şerm o. Eynî wextî de hemakrîya sûcî ya.

Verê ke wextê ci bêro ma hedefê xo yê 100.000 îmzayan vêrtî. Merheleya dîyine ya kampanya de ma do bi têkoşînê huqûqî dewam bikerê. Ma do muracatê Neteweyanê Yewbîyayeyan bikerê û seba ke ê wezîfeyê xo bîyarê ca têkoşîn bikerê. Ma do sey vengê cinîyan hesab bipersê. Ma do bi di babetanê bingeyînan kampanya rê dewam bikerê. Ma do semedê roşnkerdişê Qirkerdişê Parisî û cinîyê ke Efrîn de ameyî remnayene, qetilkerdene û raştê tacîz û tecawuzî ameyî têkoşîn bikerê.

Merheleya verên a kampanyaya ma de cinîyan ê kurdan û dostanê ci mojna dinya ke paradîgmaya cinîya azade û komelê azadî ya Raybe Apoyî senî muhîm a ke hêzê cinîyan esto ke komelê neweyî afernê. Cinîyanê ke bi çalakîyanê renginan û afernayoxan hêzê têkoşînê cinîyan mojna dinya ma înan selam kenê. Faşîzm do vîn bikero, cinîyî do ser bikewê.''

Eşkerayîye bi slogananê ''Cinî cuye azadîye'' qedîyaye.