TJK-E bi eşkerayîyêka nuştekîye da zanayene ke bi sloganê vera îşxal û qirkerdişê cinîyan ma Rojawanî pawenê do 11ê kanûne de Bruksel de çalakîyêk virazê û semedê tewrbîyayîşê çalakîye veng da.

Eşkerayîye de ca dîya nînan:

‘‘Seba ke hêrişê îşxalî û qirkerdişî Rojawanî de bêrê qedînayene ganî dezgehê mîyanneteweyî cade têbigêrê. Bitaybetî nê di aşmanê peyênan de sere de cinî û domanî vera şarê Rojawanî sucê merdimîye yeno kerdene. Berpirsîyarê nê sucan o verên Erdogan o. Erdogan dişmenê cinîyan o.  Her doman û cînî yê ke ameyî kiştene bi talîmatê Erdoganî ameyî qetilkerdene. Semedê naye zî ganî sere de Erdogan heme sucdarî mehkemeyêka mîyanneteweyî de bêrê hukmkerdene û sahayê hewayî yê Rojawanî firdayîş rê bêro qedexekerdene. Seserra 21. de verê çimanê heme dinya de girkerdiş û îşxalo ke yeno kerdene ganî bêrê vindarnayene. Heta ke nê waştişê ma nêrê ca, ma cinîyî do timûtim têkoşînî rê dewam bikerê. Na çarçewa de ma heme cinîyan ra wazenê ke wa tewrê çalakîya ma ya ke do 11ê kanûne de Bruksel de bêro viraştene bibê. Ma reyna veng danê dezgehanê mîyanneteweyî ke wa wezîfeyê xo bîyarê ca.‘‘