Vera Platformê 'Ma do Verê Kişîyayîşê Cinîyan Bigêrê' dewaya qefilnayîşî ameye akerdene. Platform bi 'vera qanûn û exlaqî xebatan kerdiş' yeno sûcdarkerdene.

Endama Platformê 'Ma Do Verê Kişîyayîşê Cinîyan Bigêrê' Tuana Gençer derheqê qefilnayîşê platformî de ANFyî rê qisey kerd.

Gençere vist vîrî ke platform bi 'vera qanûn û exlaqî xebatan kerdiş', 'binê pawitişê heqanê cinîyan de wazeno keyeyî çin bikero û keyeyan parçe bikero' yeno sûcdarkerdene. Gençere vat: ''Dosyaya dewa de delîlêko zelal çin o. Ma 12 serrî yo vera şîdetê serê cinîyan têkoşîn kenê. Ma kerd ke çîyo sey 'cinîyetê eşqî û namusî' çin o û nê cînayetê cinîyan ê. Netîceya têkoşînê ma de ewro Wezîrîya Keyeyî zî doneyê cînayetanê cinîyan gêna. Hende têkoşînî ra dima xora ma na dewaya venge qebul nêkenê. No vera ma tedaya verêne nîyo û kerdişê winasênî nêeşkenê verê têkoşînê ma bigêrê.

Ewro her warê cuye de cinîyî est ê û seba heqanê xo têkoşîn kenê. Îqtîdar pê ney qayîl nîyo. La na saete ra pey îqtîdaro sîyasî nêeşkeno têkoşînê cinîyan bigêro. Têgêrayîşê cinîyan hînî bihêz o. Nê îqtîdarî seba ke peynîya ci ameya, Peymana Îstanbulî fesh kerde, cinîyî bi hawayêkê bêhuqûqî destbend kerdî. Îqtîdar keno ke ma bitersno. Ma do na dewaya qefilnayîşî teqîb bikerê. Na dewa vera pêro têgêrayîşanê cinîyan o. Ma venga pêro cinîyan û rayaumûmîye danê ke wa wayîrê komeleya ma vejîyê. Nê teda û dewayî qetî do ma asteng nêkerê.''