Hemsereka Partîya Herêman ê Demokratîkan (DBP) ya Wanî Gulderene Varli ANFyî rê qisey kerd û pare kerd ke betalkerdişê Peymana Îstanbulî ra dima cinîyî rehet kişîyenê û AKP cesaret dano camêrdan.

Varliye îfade kerd ke îqtîdar û hişmendîya camêrdan keda cinîyan çin hesibnenê û warê cuye cinîyan rê kenê teng û vat: ''Dima ke Tirkîya Peymana Îstanbulî ra xo apey girewt cinîyî hîna rehet kişîyenê. Oyo ke cesaret dano kiştoxan qanûnê nikayên ê. Êyê ke cinîyan kişenê zanenê ke nê qanûnan înan pawenê. Tirkîya de her roje xeylêk cinîyî kişîyenê. Cezaya qîme nêdîyena kiştoxan, no zî cesaret dano camêrdan.''

Varliye da zanayene ke dişmenîya AKPyî ya cinîyan bi hawayêkê zelalî asena û vat: ''AKP beno sebebê nê cînayetanê cinîyan. Peymana Îstanbulî pê bira AKPyî bi hawayêkê keyfî wedarîyaye. Naye ra dima zî kişîyayîşê cinîyan zêdîyayî. Tek mesuldarê ney AKP yo. Nameyê DBPyî ser o ma vera polîtîkayanê camêrdan û cînsîyan her ca de têkoşîn kenê. Pê krîterê temsîlîya têdûşte her taxe, kuçe û keye de ma kar kenê. Têkoşînê ma do dewam bikero.''