Meclîsê Cinîyan ê HDPyî bi wesîleya 25ê Teşrîna Peyêne Roja Têkoşînê Vera Şîdetê Serê Cinîyan a Mîyanneteweyîye merkezê Colemêrgî de vera polîtîkayanê şerê taybetî rayraşîyîş kerd. Badê rayraşîyayîşî Vervatoxê Meclîsî Ayşe Acar Başaran Hemsereka Pêroyî ya DBPyî Salîha Aydenîzî qisey kerd.

Qiseykerdişan nê ameyî vatene: ''Ma sey TJA, DBP û Meclîsê Cinîyan ê HPDyî waşt vera şîdetê camêrd-dewlete eşekrayîye bidê la çi heyf ke her cayî tîya zî ma raştê  eynî manzara ameyî. Hêzê dewlete ke vera hêrişê serê cinîyan çîyêk nêkenê, cinîyan nêpawenê semedê birnayîşê vengê cinîyan reyna tîya ameyî pêser. Gama ke cinîyî raştê şîdetî yenê, kuçeyan de yenê qetilkerde, cinî û domanî raştê tacîz û tecawuzî yenê, cinîyî semedê pawitşî muracatê ci kenê nê hêzî mabên çîn ê. La pê heme hezê xo tîya de yê û qala qedexeyê walîtîye kenê. Senî yo qedexeyo ke têna vera HDPyî yeno şuxulnayene.

Nê bajar de her kes eşkeno çalakîye bikero, vera HDPyî û çalakîyî hêrişî eşkenê bêrê kerdene la HDP nêeşkeno vengê xo vejo. Eke HDP eşkerayîye bido barîkatî cade amede yê. Xora ma stratejîya hukmatî ya vera cinîyan zanê. Vera cinîyan ê kurdan û Kurdîstanî polîtîkayêka taybete yena caardene. Tirkîya de bi şîdetî yeno waştene ke cinîya makule bêro afernayene. Kurdîstan de şer serê cinîyan ra yeno rayraberdene.  Sey leteyêkê şerê taybetî tecawuz sey metodêkî yeno şuxulnayene. Ma tîya ra rena vanê ma cînîyî û cinîyê kurdan çirey verê zextan de milê xo çewt nêkerd, ma do ewro ra tepîya zî peyser gamêke meerzê. Ma do pê têkoşînî sîstemê şima yê leyminî birijnê. Cinîyî bi pîlkerdişê rêxistinkerdişî û xopawitişî do bibê azad.''