Şaristanê Qamişloyî yê Rojawanî de serkêşîya nuştox, sîyasetmedar, dezgeh û sazgehanê cinîyan de Înîsîyatîfê Cinîyan ê Seba Pawitişê Kurdîstanî ronîya.

Eşkerayîya înîsîyatîfî de ame vatene ke krîz û şerê dinya tewr zaf tesîrê Rojhelatê Mîyanênî kenê û Kurdîstan zî bîyo merkezê nê şerî. Înîsîyatîfî pare kerd ke dewleta tirke ya îşxalkere wazena serrgêra 100. ya ronayîşê xo de sînoranê Mîsak-i Mîllî bîyara ca û coka hêrişê Başûr û Rojawanê Kurdîstanî kena. Înîsîyatîfê cinîyan ard ziwan ke dewleta tirke nê şerî de tewr zaf cinîyan kena hedef.

Eşkerayîye wina dewam kena: ''Sey cinîyan ma zanenê ke lazimîya ma ya tewr pîle yewî ya. Seba pawitişê Kurdîstanî yewîya cinîyan wayîra rolêkê stratejîk a. Seba qedînayîşê îşxalê dewleta tirke ganî cinîyê çar paçeyanê Kurdîstanî û teberî tewirêkê hemparî bimojnê. Nê esasî ser o ma nê înîsîyatîfî awan kenê.

Ma sey Înîsîyatîfê Cinîyan ê Seba Pawitişê Kurdîstanî nika ra pey vera îşxalî xebat û çalakîyanê hemparan bikerê, bi tewirê xurtî peynîya hêriş û îşxalê dewleta tirke bîyarê. Sloganê ma 'Cinîyê Kurdîstanî Vera Îşxalî Pawenê' yo. Ma venga pêro cinîyan danê ke tewrê înîsîyatîfî bibê û vera hêrişan û îşxalî Kurdîstanî bipawê.''