Îran de cinîya kurde Mehsa Emînîya 22 serre 13ê êlule de hetê 'polîsanê exlaqî' ra tepişîyabi, îşkence dî û hîrê rojan ra dima nêweşxane de dinyaya xo bedilnabî. Şarî goş nêda hişyarîyanê dezgehanê asayîşî û bi sloganê 'bimiro dîktator' çalakîyê protestoyî kerdî.

Çalakîkeranê verênan verê nêweşxaneyê Kasra de ke tede Mehsa tedawî bîyêne ameyî yewca. Komanê heqanê merdiman da zanayene ke hêzanê asayîşî gazê îsotî vera şarî şuxilnayo û xeylêk kesî tepiştê.

Dîya zanayene ke çalakîya Seqizî de hêzanê rejîmmê Îranî guleyî eştî çalakîkeran ser û xeylêk kesî birîndar bîyî, hemwelatîyê bi nameyê Kiyan Direxşan zî ame qetilkerdene. Derheqê hûmara birîndaran de agahîyêka bîne nêameye destvistene.

Cenazaya Mehsa 17ê êlule de seba definkerdişî ameye berdene bi Kurdîstanî.

Rêxistina Heqanê Merdiman a Hengawî ra Soma Ristemî pare kerd ke dezgehanê asayîşî tedaya keyeyî kerd ke bêmerasîm cenazaya bêra definkerdene.

Rixmê hişyarîyan zî bi seyan kes seba merasîmî şaristanê Seqizî yê Mehsa de ameyî pêser û înan bi sloganê 'Bimiro dîktator' hukmat protesto kerd. Merasîmê cenaza de sereyê xo akerdî.

Şaristanê Sine yê Rojhelatê Kurdîstanî de zî serkêşîya cinîyan de şar werişt we. Nawnayîşanê Sine de bêmabên sloganê 'Cinîye, Cuye, Azadîye' û 'Şehîdî nêmirenî' ameyî vatene.

Rêxistinanê komelê sivîlî yê kurdan seba grevê pêroyîyî veng da. KODAR, PJAK Û KJARî de bi eşkerayîyan venga şarê Rojhelatî û Îranî da ke waştişanê meşrûyan ê cinîyan rê paştî bidê.

Wina pawîyeno ke roja dişemetî temamîya Rojhelatê Kurdîstan de grevo pêroyî do bêro kerdene. 

Rixmo ke şahîdan dîyar kerd ke wesayîtê destbendkerdişî de polîsan dayo Mehsa ro, polîsan îdîa kerd ke Mehsa krîzê qelbî ra merda. La keyeyê Mehsa da zanayene ke yew nêweşîya aye çin bîye.

Dewleta Îranî serebûtan ser o înternetî sînordar kerd. Medyaya dewlete pare kerd ke derheqê mergê Mehsa de tehqîqat dîyayo destpêkerdene.