Gerîlayê YJA Starî xeta ke şorişgêra pîle Sara (Sakîne Cansiz) afernaye de vera hêrişanê îşxalî yê dewleta tirke xover danê. Nê gerîlayan ra yewe zî Vîyane Soran a.

Vîyane Soran vana ke înan hêzê xoverdayîşî têkoşînê Sarayan ra girewto û wina dewam kena: ''Ma pêro şervanê hemra Sara yê. Sey cinîyêka şorişgêre semedê azadîya cinîyan bi cesartê pîlî şer kerd, bi îrade û têkoşînî têkoşînê cinîya azade înşa kerd û heme dinya rê da naskerdene. Her kesî fam kerd ke heta cinîye azad nêbo komel nêeşkeno bibo azad. Ya zî merdimîye nêeşkena bibe azad. Coka hemra Sara serkêşa ma ya û rayîrê azadîye mojna ma.''

Gerîla Vîyane Soran bale ante tesîrê fermandare Sara yê serê artêşa cinîyan ser û vat: ''Zordarîye do bi xeta têkoşînê embaza ma ya Sara do bêrê çareserkrdene. Embaze Sara bi îrade û cesaretê xo heme dinya de ameye naskerdene. Ma pêroyî estbîyayîşê xo kesayetê embaze Sara de vînenê. Ma nasnameyê cinîya azade şexsê embaze Sara de mûsayî. Eke ma ewro koyanê Kurdîstanî de sey artêşa biçeke estê,  no xeyrê keda embaze Sara de yo. Rayîro raşt mojna ma. No semedê ma hem destpêkerdiş o hem zî sebebê serkewtişî yo.''

Vîyane Soran ard ziwan ke aye têna yew rey şehîde Sara dîye la senî ke tim cayê ci de bo tim tira hêz gena û qiseykerdişê xo wina domna:  ''Rindîye û vindertişê embaze Sara mi ser o zaf tesîr kerd. Hema zî o sehneyo biheybet verê çimanê mi de yo. Komel de tim bi vatişanê sey 'gijikê ci derg, aqilê kilm o' cinîyî wirdî yenê vînayene. Embaze Sara heme zûrê sîstemê serdestî vetî meydan û raştîye mojna heme dinya. Raştî naya ke cinîyî eşkenê komelî rê serkêşîye bikerê û komelî bipawê. Embaze Sara tim cesaret dayêne cinîyan û vatêne wa paştîya şima şima ra pêt bo. Tim vatêne bi cesaret û îradeyî gamanê xurtan bierzê. Ma zî sey şervananê embaze Sara her gama ke erzenê de ma do têkoşînê aye bidê domneyene. Ma do koyanê Kurdîstanî ra heta zîndanê Amedî û Ewropa vera hêrişanê dişmenî têkoşînê tarîxî bikerê. Embaze Sara semedê ma eşqê cuye ya. Embaze Sara yew raştîya cuye afernaye ke çew nêeşkeno aye çîn bikero.''