Zîndanan de binpaykerdişê heqan, teda, îşkence û mergî zêdîyenê. Na menge de 7 tepişteyan bi hawayêkê şikdarî zîndanan de dinyaya xo bedilnaye.

Cinîyanê Amedî derheqê babete de Jinnewsî rê qisey kerd û waşt ke tepişteyê nêweşî wa vera bidîyê. 

Selva Taşa ke bira û lajê ci zîndan de yê pare kerd ke lajê ci Kirikkale ra surgunê Zîndanê Sîncanî ameyo kerdene. Selva vat: ''Lajê mi zaf nêweş o la nêerşawîyeno nêweşxaneyî. Hacetê ke ma şawenê, kargoyî nêdîyenê ci. Tepişteyê nêweşî zîndan de mirenê. Ma ney qebul nêkenê. Ma do tim hetê tepişteyan de bibê. Pêro tepişteyî domanê ma yê. Têkoşînê înan têkoşînê ma yo.''

Hanîfe Akin zî waşt ke tedaya vera tepişteyan cade biqeda û vat: ''Ê tepişteyan ra tersenê coka her roje hêrişê înan kenê. Kerdişê înan zulm o la ma nêeşkenê vera ci çîyêkî bikerê.  Heqê weşîye heqo tewr girîng o. La no heq Tirkîya de nêdîyeno tepişteyan.''

Meleke Andiç vat: ''Wa zîndanî ra hînî cenazayî mevejîyê, tepişteyê nêweşî wa vera bidîyê. Seba ney ganî ma pêro wurzê payan ser. Eke ma yew bibê, 24 saetan de pêro meseleyan safî kenê. Ez venga her kesî dana ke bêrê ma bibê yew û nê zulmî biqedînê.''