Dima ke Tebqa, Reqa, Dêra Zorê û Minbic cerganê DAÎŞî ra ameyî pakîkerdene nê cayan de cinîyan dest pê xebatanê xo yê rêxistinîye û awankerdişî kerd. Naye ser o 1ê hezîrana 2021î de Komelê Cinîyan ê Zenobîya ame awankerdene. Vervatoxa Komelê Cinîyan ê Zenobîya Sewsene Xelef derheqê xebatanê înan de ANFyî rê qisey kerd.

Sewsene Xelef pare kerd ke cinîyan 2022 de bi felsefeya Rayberê Şarê Kurdî Abdullah Ocalanî averşîyayîşê pîlî ardî ca û vat: ''Dima ke Tebqa, Reqa, Dêra Zorê û Minbic DAÎŞî ra ameyî azadkerdene cinîyan xo rêxistin kerd û dest pê awankerdişê dezgehanê xo kerd. Komelê Cinîyan ê Zenobîya zî o çax ronîya. Ma sey komelî perwerdeyan danê û cinîyan rêxistin kenê. Mîyanê komelê ma de sey komîteyê sulhî, komîteya arşîv û çapemenîye û rêxistinîye est ê. Ma 2022 de zafêr giranîye daye projeyanê xoperwerdekerdişî, xorêxistinkerdişî û ekonomî. Ma kenê ke cinîyî beişkê hetê ekonomîkî ra xo bidevirnê. Mîyanê serre de zî seba çareserkerdişê şîdetê vera cinîyan ma îdareyî ronayî. Ma bi nê hawayî xo resnayî cinîyan û kerd ke babete ser o înan perwerde û hayîdar bikerê.''

Xelefe da zanayene ke erkê înan vera şîdetê camêrdan têgêrayîş o û vat: ''Ma eşkenê vajê ke awankerdişê nê dezgehan ra dima hişmendîya şîdetî û bi xo şîdet kêmîya. A raşt têkoşînê cinîyan o ke xo felsefeya Abdullah Ocalanî ser o awan kerdo her ca de xo rêxistin kerd. Ma plansazîya xo ya 2023yî kerde. Hetê plansazîye yo tewr girîng zî no yo ke ma xo biresnê pêro cinîyan û têkoşînê cinîyan esasê felsefeya Rayber Apoyî de biresnê pêro cinîyan. Cinîyî 2023 de bi hawayêkê bihêzêrî têkoşînê xo rê dewam bikerê.''