Cinîyî Festîvala Sakîne Cansiz ya 8. de pê şîarê 'Vera qirkerdişê cinîyan têkoşînî pîl bikerê' ameyî yewca. Festîvale rayberîya 38 dezgehanê cinîyan de şaristanê Zurihî de yena kerdene û emser dîyarîya Denîze Poyraz bîye. Xeylêk cinîyî tewrê festîvale bîyî, warê festîvale pê fotografanê cinîyan ê kurdan ê rayberan xemilîya û war de fotografê Denîze Poyraz û Sakîne Cansiz ameyî daliqnayene. 

Çarçewa festîvale de serê bîlboardan de qala Sakîne Cansiz, cinîyan ê têkoşeran ameye kerdene, xeymê dengbêjan, kargehê kayî yê domanan ameyî akerdene. Festîvale de bebatanê sey bedenê cinîyan, Peymana Îstanbulî, çetinîyanê entegrebîyayîşê sosyolojîk û kulturelî, tesîrê nîjadperestî û sîstemê camêrdîye de panelî ameyî serûberkerdene.

Festîvale de Aktîvîsta TJK-E Zozane Serhad têkoşînê Sakîne Cansiz ser o qisey kerd û vat: ''Ma do têkoşînê Sara, Rojbîne û Ronahîyan berz bikerê, cinîya azade û komelê azadî awan bikerê.''

Koordînasyonê KJKyî zî no mesajo nuştekî erşawit festîvale: ''Rojawan de, Efrîn û Şingal de cinîyê kurdî yenê remnayene, bazaran de yenê rotene û pê îşkence kişîyenê. Pê operasyonanê îşxalî yê vera Başûrê Kurdîstanî destkewteyê cinîyan ê kurdan yenê hedefkerdene. Cinî û ciwanê ke vera şerê qirkerdişî yê rejîmê AKP-MHPuî ewro Zap, Metîna û Avaşîn de xo ver danê derbanê giranan danê îşxalkeran ro.

Ganî ma xo vîr a nêkerê ke estbîyayîşê komelêkî binê tehlukeyî de yo. Xoverdayîşê grevê vêşanîye yê embazanê tepişteyan wazeno sîstemê tecrîdî birijno. No xoverdayîş do ser bikewo. Ma xoverdayîşê cinîyanê ke zîndanan, waran, koyan, dibistanan û keyeyan de xo ver danê selam kenê. Ma venga pêro cinîyan û şaran danê ke vera polîtîkaya qirkerdişî ya kurdan û talanî wa têkoşînî geş bikerê û her ca bikerê warê şorişî.''

Festîvale de Kewê, Jala, Dîlan Top, Venge Destar, Hozan Gulan, Medî, POP Chestra vejîyayî sehne ser. Federasyonê Elewîyan ê Demokratîkan (FEDA) zî bi wesîleya menga Muharemî warê festîvale de aşûre vila kerd.