Sereka Konseya Cinîyan a Îdareyê Xoserîya Demokratîke yê Vakur û Rojhelatê Sûrîye Cîhane Xidro derheqê YPJyî, têkoşînê cinîyan, îşxal û hêrişanê Dewleta Tirkan ê vera Rojawanî de qisey kerd.

Xidro vat: "Ma bi hêzê xo kewtê tevgêrayîşê azadîye. Babetanê sîyasî, komelkî, kulturî û leşkerî de ma xo îsbat kerd. YPJ nika pêro dinya de yeno şinasnayene. No xo bi xo nêbo. Netîceyê têkoşînêkê pîlî de bi. Mîyanê şert û mercanê zoran de ma erdê xo û ameyoxê xo pawitî. Wazenê şar û cinîyê Rojawanî bêwayîr bimanê. Senî ke Hevrîne Xelef qetil kerde zaf qirkerişî kerdî ke ma bi çimanê xo dîyî. O yo ke Erdogan û cergê ci cinîyan rê rewa vînenê ameyoxêko winasî yo. Mi Hevrîne Xelef nas kerdêne. A rast a zî cinîyêka raybere bîye. Aye xo seba azadîya cinîyan û komelî feda kerd. Derdê aye yê tewr pîlî mesela cinîyan bi. Nika Serêkanîye de, Girê Sipî de, Eyn Îsa de, Til Temirî de cinîyê ereban verê cepkeyan de şer kenê. Cinîyê ereban, kurdan, sûryanan, asûran û armenan pîya xo ver danê. Eke hewce bibo ma do pêro pîya dest bierzê çekan la ma do qet îşxalê Dewleta Tirkan qebul nêkerê. Ma do bi ruhê Hevrîne Xelef xo ver bidê."

Xidro tewr peyêne venga cinîyan da û vat: "Faşîzmê Erdoganî gef ro pêro cinîyan waneno. DAÎŞî reyde derbasê Serêkanîye û Girê Sipî bi. Wazeno nê herêman pêro îşxal biko û cinîyan mehkûmê amayoxê tarî biko. Ganî ma nê prosesî bivurnê. Keda ma esta, ma gonîya xo rişnenê, canê xo feda kenê. Pêro seba ameyoxê ma yo. Ganî ma sey cinîyan vera dişmenî wurzê payan ser. Vera faşîzmê Erdoganî û AKPyî 25ê teşrîna peyêne de ma çalakîyanê tewr pîlan bikê."