Xoverdayîşo heta helmê peyênî: Gulbahare Gulhat

Gulbahare Gulhata ke heyrana gerîlayanê cinîyan bîye heta ke şehîd bîye zî bi çêrî xo ver da.

Fermandaranê YJA-Starî ra Gulbahare Gulat (Selma Kaya) 1991î de tewrê têkoşînê bîye. 1997î de dima ke Rayberê Şarê Kurdî Abdullah Ocalanî ra Şamî de perwerde gêna reyna verê xo dana koyanê azad ê Kurdîstanî. 16 serrî mîyanê têkoşînê azadîye de bi helwestêkê çêrî, biredar û wayîrê îdîa xo resnena sewîya fermandarîya cinîyan a nimûneye. Gulbahare Gulhata ke taybetmendîyê cinîyanê Botanî tey estê bi vengê xo yê zerrîzîzî pêro cuya welatê xo ana ziwan. Gulbahare Gulhat 4ê kanûne 2007î de vera artêşa tirke bi xoverdayîşêkê pîlî şehîd bîye.

‘Ez Heyranê Gerîlayanê Cinîyan Bîya’

Gulhata ke keyeyêko welatperwerî de bîya pîl hîna domanîya xo de gerîlayan vînena û kewena binê tesîrê nêzdîbîyayîşê înan ê bizerrî, bicanî û gonîgermî. Gulhate 2007î de verî ke şoro warê Vakurî kamereyanê gerîllayan rê wina behsê xo kena:

“Hîna domanîye de mi gerîlayan ra zaf hes kerdêne. Demo ke mi ê dîyêne, ez heyranê gerîlayanê cinîyan bîyêne. Mi zaf waştêne ke tewrê înan ba. 1991î de ez tewrê gerîlayan bîya. Demo ke newe tewrê ci bîya şertê gerîlayan mi rê zor ameyî. Rasta zî zaf çîyêko weş bî ke merdim koyanê azadan de gerîlayan nas bikero. Çunke her gama cuye to ra bedêl û xoverdayîşêkê pêtî wazena.”

‘Mi Rihê PKKyî Yo ke Fek Cira Veranêdano Nas Kerd’

Gulhata ke demêko kilm Botanî de manena verê xo dana Behdînanî. Dima ke tîya perwerdeyîya zimistanî vînena 1992î de Şerê Başûrî dest pêkeno. Gulhate derheqê Şerê Başûrî de wina vana:

“Destpêkê şerî de ez warê Koyê Sîyayî de menda. Vera têgêrayîşê ma yê azadîye yo PKKyî konseptêko pîl ê înkar û îmhayî estbî. Reya verî ez mîyanê şerêkê giranî de menda. Ma derbê xurtî dayî dişmenî ra, reya verî hetê mi de embazê mi hem şehîd hem zî birîndar bîyêne. Nê halî afmosferê hîsanê pîlan ardêne warye û bîyêne sebebê têkoşînê hîna xurtî. Mîyanê nê şerî de mi rihê PKKyî yê azadîye, xoverdayîş û fek tira veranêdayîşî nas kerd.”

Dîyalogê Aye bi Ocalanî ra

Şerê Başûrî ra dima demêk Zele de perwerde bena. Gulhata ke Şerê Başûrî de bîya wayîrê tecrubeyî seba ke Ocalanî ra perwerde bigîra 1997î de şona Şam.

Verî ke reyna abigêra koyanê azad ê Kurdîstanî dîyalogê aye yo peyên ê Ocalanî reyde wina yo:

“Ocalan: Belê Gulbahare, to çi netîce vet?

Gulbahare: Serokê mi, verî ke ez bera nê warî, ez eşkena vaja ke no ferasseto xorîn mi de çin bî. Eşkena vaja ke pratîkê mîyanê gerîlayî, analazê Reyberîye ra mi netîceyî vetî û bîya wayîrê tecrubeyî. Ez wazena Rayberî, rastîya kurdan û kesayetîya fermandar a cinîyan ser o hîna pêt biba.

Ocalan: Ti vana, hêzê minê çerekerdişî bîyê pêt? Ti vana ez resta yew rewşêk ke verî ra cîya ya ma ney?

Gulbahare: Belê Serokê mi.

Ocalan: Ganî bi yew hawayî yo ke hêzî dano hemrayanê xo, bi yew hawayî yo ke şer de ca nêdano kêmesîyan to tewrê tevgere be. Ti emîn a ke bi ser bikewe? Bi xo yar a?

Gulbahare: Belê Serokê mi, bi hêzî yo ke mi to ra girewto ez bawer kena ke têkoşînê azadîye rê bereyî bika.

Ocalan: Hevale, ti eşkena sozê serkewtişî bide ke ti nêbena bar hemberê naye de barî wegêna?

Gulbahare: Soz dana Serokê mi.

Ocalan: Nê bingeyî ser o serkewtişanê pîlan wazena.”

‘Dewro ke mi rê tewr zor bî 15ê şibate bî.’

Gulhata ke payîzê 1997î de parwerdeyo ke Ocalanî ra girewto xelisnayo, reyna şerê giran ê Başûrî yê 1997-1998î de mewzîyanê verênan de cayê xo girewt. Gulhate prosesê Komployê Mîyanneteweyî yo ke zaf tesîr bi aye keno ser o wina vana:

“Dewro ke mi rê tewr zor ame prosesê Komloyê Mîyaneteweyî yê 15ê şibate 1999î bî. Çunke keda pîle ya Rayberî her kesî ser o estbîye, bi taybetî zî ma kadroyan ser o zaf keda xo bîye. Rayberî sebebanê ke bîyê şertê esaretî ser o vano “dostîyê sexteyî û hemrayîyê kemî bî sebebê esaretê mi.” Ney ser o zaf fikirîya. Ez resta ney netîceyî ke eke ma têkoşînê azadîye de serbikewê beno ke o taw ma eşkenê Rayberî rê bibîme cewab.”

‘Seke 24 seatî Rayberî Reyde Ciwîyena’

Gulhata ke gelek wîlayetanê Başûrî de serranê 1997î ra heta 2007î sewîya fermandarî de wezîfeyî girewtî, 2007î de verê xo da Gabar û Botanî. Gulhate derheqê erdê Vakurî de wina vana:

“Seba mi şîyayîşê erdê Vakurî mi rê ameyêne manaya xo reyna resnayîşê warê Rayberîye. Naye ra seke 24 seatî Rayberî reyde ba ciwîyayêne. Şehîd Erdal Sîncarî tim mi ra vatêne “Ti tam wayîrê a kesayetî ya ke warê Botanî de gerîlayî bika, eke rojêk şîya Vakur şo Botanî, bi taybetî şo warê Gabarî.”Gelek embazanê şehîdan zî mi ra eynî çîy vatîbî. Naye ra mi waştêne şora nê warî û waştişanê şehîdanê ma bîyara ca.”

Gulbahare Gulhat Gabarî de şerêkê vera artêşa tirke de bi xoverdayîşêkê pîlî şehîd bîye.