Denîze Poyraz 17ê hezîrana 2021î de bînaya HDPyî ya Îzmîrî de amebî qetilkerdene. Denîze Poyraz sey xeylêk şaristanan Anqara de zî ameye yadkerdene.

Hemvervatoxa HDKyî ya Anqara Dîleke Yilmaz ANFyî rê qisey kerd û ard ziwan ke qetilkerdişê Denîze Poyraz a raşte hêrişê vera HDPyî yo.

Dîleke Yilmaz dîyar kerd ke kiştox Onur Gencer bi rehetî kewt zere û ey Denîze narê bînaya partîye de kişte. Dîleke Yilmaz vat: ''No çi welatêkê bînî de biameyêne kerdene o welat weriştêne payan ser. No qetlîamê bînaya HDPyî nêno manaya ke vera aktîvîstêka HDPyî ameyo kerdene. No hêriş vera îradeyê şarê kurdî ame kerdene. Dewlete û hêzanê ci yê paramîlîteran bi nê hawayî cewab da têkoşînê demokratîkî. 20 serranê AKPyî û 6 serranê koalîsyonê AKP-MHPyî de vera HDPyî têgêrayîşê antîdemokratîkî yenê kerdene.''

Yilmaze eşkera kerd ke polîtîkaya înkarê kurdan dewam kena û kerdişê faşîst û tekperestî bi israrî dewre de yê. Yilmaze vat: ''Tirkîya de demokrasî qetî nêameye dîyene. Cinîyê ke têkoşînê femînîstî azadîya cinîyan kenê, qetî do waran û kuçeyan war meverdê. Wexto ke embaza ma Denîze Poyraz ameye qetilkerdene, xeylêk rêxistinan paştî daye ma. Wexto ke ma kuçeyan de bîyî, cinîyê kurdî zî kuçeyan de bîyî.''