Fermandarîya Qerargehê Merkezî ya YJA-Starî bi wesîleya serrgêra şehadetê Zeynepe Kinaci (Zîlane)a ke 30ê hezîrana 1996î de Dêrsim de çalakîya fedayîye kerde, eşkerayîyêke kerde.

Eşkerayîye wina ya: 

''Embaze Zîlane vengê waştişê azadîye û serewedaritişî yê cinîyan ê kurdan, bombayê serê xo laboratuwarê polîtîkaya şerî yê dewleta tirke Dêrsim de teqnayî. Ma serfermandara xo Zîlane û pêro şehîdanê xo bi minetî yad kenê. Ma roja çalakîya Zîlane 30ê hezîrane sey newera bîyayîşê tarîx û cinîyan bi îdîayêka pîle ya azadîye pêşwazî kenê. Bi taybetî ma na roje ya Rayber Apoyî û şehîdan fîraz kenê, pêro şaranê ke vera faşîzmî xo ver danê selam kenê.

Îdîaya cuye ya Zîlane pîle bîye û aye waştêne biba wayîra cuyêka manadare. Coka a rêçê ê kesanê ke seba ke oxirê ci de bimirê hende cuye ra hes kerdêne ser o şîye û pêro dinya rê mojna ke heqê cuya rûmetêne senî pawîyeno.

Embaze Zîlane wina ercna ke Rayberîye garantîya cuya azade ya cinîyan, şarê kurdî û merdimîye ya. A seba ke verê komployê muxtemelî yê mîyanneteweyî bigêra bîye mertalê cuya azade. Zîlane pê tewirê xo manaya Rayberîye û pê çalakîya xo nameyê caardişê Rayberîye yo. Ewro zî hema hegemonyaya faşîste pê heman metodan sere de Rayberîye hêrişê cinîyan, şarê ma û pêro merdimîye kena. Gerîlayê ke vera nê hêrişan de tek hêz o, îsbat kenê ke pê mîrasê Zîlane û pê israrê Rayberîye û azadîye faşîzm do birijo.

Nê erdê neolîtîkî de cinîye yena manaya cuye. Azadîye û cuye felsefeya esase ya cinîyan a. Azadîye, heskerdiş, komunalbîyayîşê hêzê berardişî yê xoza, exlaqo komelkî û kulturel pêro berhemê cinîyan ê. Coka planê qirkerdişê kulturelî yê vera cinîyan ê kurdan planê qirkerdişê cinîyan o. Çunke kamyew komelî de cinîye bikişîya cuye bena bêqîmete. Zîlane na raştîye dîye û vera na cuya bêmana çalakîya xo kerde. Aye pê çalakîya xo cinîye û tarîx newe ra kerdî gandar. Xeta çalakîye ya Zîlane xeta ê kesan a ke seba azadîye her çi kenê. Na xete pê gonîya Gulan, Doga, Eylem, Sema, Esmere, Zelale, Nûjîne, Koçeran û şerwananê bînan Amed de, Botan de, Heftanîn de, Garê de, Metîna de û Zagrosan de her roje bena pîlêre û dewam kena.

Serra 2021î serra zîlanbîyayîşî ya. Destpêkê serre de dewleta tirke ya kolonyalîste hêrişê Garê kerd û rixmê pêro îmkan, gazê kîmyewî û paştdayîşî zî bin kewte. No binkewtişê artêşa tirke Garê de mojna ke dewleta îşxalkere pê gerîlayanê zîlanwarîyan do bin bikewa. Dewleta faşîste û kolonyalîste Garê ra dima hêrişê Zagros û Metîna kerd. Gerîlayan sey Garê pê zîlanbîyayîşî cewabê nê hêrişan kerd. Gerîlayan pê Hemleyanê Cengê Xabûrî û Bazanê Zagrosî bi ruhê fedayîyê PKKyî xo ver da. Mamreşo de Sara bîye Zîlane, Aris Faris de Amara bîye Zîlane, Merwanos de Ekîne, Asya û Jine bîye Zîlane. Zîlanbîyayîş mezgê dişmenî keno lete bi lete û mujde dano ke peynîya zulmê dişmenî ameya.

Rêxistina çeteyan a AKP-MHPyî verê xoverdayîşê gerîlayan de teng bîye. Dewleta tirke dezgehanê dewleta xorine de gêrena çareya xo. Qirkerdişê Denîze Poyraz îsbatê ney o. Pîyatêkoşîn kerdiş nê planê îmha yê vera şarê ma do çin bikero. Şarê ma wa vera nê çeteyanê dewleta xorine bêveng nêmano û pê çêrî xoverdayîş biafernê. Wezîfeyê ma yo tarîxî yo ke ma esasê şerê şorişgêrî yê şarî de bi hawayêkê topyekûnî xo ver bidê.

Ma sey gerîlayanê YJA-Starî nê koyan de seba azadîya şarê xo her roje benê Zîlan, çerxê zulmî yê dişmenî şiknenê. Zîndanan de embazê ma seba azadîye bedenê xo helînenê. Nê prosesî de ke ma bedelanê giranan danê zanenê ke ma nêzdîyê azadîye yê. Ganî ma pê şîarê 'Wextê Azadîye' dormeyê felsefeya cuye ya Rayberîye de bêrê pêser û heta serkewtişî dewam bikerê. Ma sey şerwananê azadîye heta peynî şarê xo bipawê û hêrişanê faşîst, kanwaz, îşxalker, hegemonîkan berteref bikerê. Ma do artêşa xo ya cinîyan aver berê, vera bêkokverdayîşî her parçeyê Kurdîstanî de kokê xo bikerê binê erdî û qesasê xo bigêrê. Ma bedelanê xo yê pîlan ra hayîdar ê. Ma pê nê bedelî estbîyî û estê. Ma ê hêzê qesasê şehîdan ê ke pê na raştîye şinê. Her çalakîya ma do biba Zîlanwarî û faşîzmî birijna û sibayanê azadan biafernê.

Ma soz danê ke sey milîtananê fedayîyan ê Rayber Apoyî pê ruhê Zîlane bibê hêzê azadîya Rayber Apoyî û heta serkewtişî têkoşînê xo hele bi hele berz bikerê.''