Fermandarîya Qerargehê Merkezî ya YJA-Starî derheqê şehîdanê Katoyî de eşkerayîyêke daye.

Eşkerayîye wina ya:

''Gama verêne ya awanbîyayîşê merdimîye û komelî de cinîyî bi rolê pîlî têgêrayî. Kulturê Dadîye-Homaye hem hetê madî hem zî hetê manewî ra medenîyeto demokratîk aferna. Ê cinîyan ra ke nê prosesî de bi rolê pîlî têgêrayî, cinîyê kurd ê. Cinîyê kurdî pê perwerîya xo ya komelbîyayîşî, pê kulturê xo yê xurtî bîyî wayîrê ruhêkê xoverdayoxî yê esîlî. No xoverdayîş, tarîxê ma yê nêzdîyî de zî bi Besêyan, Zarîfeyan, Rindêxanan û cinîyanê ke Terteleyê Dêrsimî de xo kendalan ra eştê warî la teslîmê dişmenî nêbîyî, geş bi.

Bi hemleya PKKyî, no tradîsyonê xoverdayîşî yo tarîxî yê cinîyanê kurdan bi têkoşînê bi desan serran vurîya Îdeolojîya Xelisîyayîşê Cinîyan, Têgêrayîşê Azadîya Cinîyan, partîbîyayîş û artêşbîyayîşê cinîyan. Cinîyê kurdî bîyî wayîrê îdeolojî, têgêrayîş, partî, artêşe û sîstemê cuya azade. Xoverdayîşê embaze Sara ra heta xoverdayîşê embaze Besê Anuş, twwirê Bêrîtanan ra heta fedayîtî ya Zîlanan, cinîyan tewir, têkoşîn û xoverdayîşê xo tarîx de neqişna û tradîsyonêko esîl aferna. Tewirê cinîyan o geş bi şehadetî berz bi. Cinîyê kurdî seba pêro cinîyan nê mîrasê xoverdayîşî rê dewam kenê û game bi game ver bi serkewtişî şinê.

Xoverdayîşê cinîyan ê Katoyî zî mîsalanê tewirê esîlî yê cinîyan ê kurdan ra yew o. Seke zanîyeno wisarê 2017î de dewleta tirke ya qirkerevera Koyê Katoyî yê Elkê operasyonêkê îşxalî yo hîra dabi destpêkerdene. Vera nê operasyonî hêzanê ma yê YJA-Starî xoverdayîş kerd. Fermandaran ra heta şerwananê hêzê ma yê YJA-Starî yê Katoyî, cinîyan vera artêşa tirke mîyanê şertanê zehmetan de şer kerd. Rixmo ke binê vewre de dest û lingê înan qers bîyî embazanê ma şer kerd. Embazanê ma Nûdeme Nurhak û Hêvîye Sorxwîn serkêşîya nê xoverdayîşî kerdêne, ê û binê fermandarîya Raperîne Amed û Roza Hêlîn de Rûkene Gever, Barîne Şîlan, Avaşîn Çirav, Zinarîne Arjîn, Xwînda Kato, Stêrke Efrîn, Zîlane Qerejdax û Arîne Qerejdax bi çêrî şer kerd û şehîd bîyî. Serrgêra şehadetê înan de ma bi rêzdarî embazanê xo yad kenê û keyeyanê înan rê serweşîye wazenê.

Xoverdayîşê Katoyî xoverdayîşanê bêhempayan ra yew o û qetî nêro vîrakerdene. Seba ke ma wayîrê embazanê wina esîl û xoverdayoxan ê, ma pê înan sereberz ê. Sey YJA-Starî ma rê rûmet o ke ma do rêçê înan de şorê. Sere de Zap û Avaşîn de ma ewro her cayê Kurdîstanî de têkoşînê cinîyan û alaya xoverdayîşî berz bikerê û bi nê hawayî layîqê şehîdan bibê. Ma do seba vîrameyîşê înan her wextî ra zafêr têkoşîn bikerê, gonîya şehîdan erdî de meverdê, erjanê azadîye pîlêr bikerê û bi nê hawayî cewabê dişmenî bidê. Têkoşînê ma yê azadîye xêrê destananê winasênan ra do bin mekewo. Tewirê cinîyan ê azadan, îrade, xoverdayîş û têkoşînê cinîyan qetî do ser bikewo. Cinîya azade ya şerwane û serkewte do pêro merdimîye û şaran bida qezençkerdene.''