Fermandarîya Qerargehê Merkezî ya YJA-Starî bi eşkerayîyêke serrgêra şehadetê înan de hîrê gerîlayê cinîyî yad kerdî. Eşkerayîye wina ya:

''Serrgêra hîrêyîne ya şehadetê înan de ma embazanê xo Fermandare Peymane Bagok, Agirî Gabar û Çavrê Amed bi rêzdarî yad kenê, sere de keyeyê înan rê şarê ma yê welatperwerî rê serweşîye wazenê. Ma sozê xo dibare kenê ke armancê înan ê têkoşînî bîyarê ca.î

Çalakîkera pîle ya ARGKyî, kedkara artêşa cinîyan, fermandara serkêşe ya HPGyî û YJA-Starî embaza ma Peymane Bagok têkoşînê xo yê 28 serran de serkewtişê pîlî vistî destî, bêmabên rayraşîyayîşê xo rê dewam kerd û bîye wayîra tewirêkê rûmetênî. Embaza ma bi kulturê Mêrdînî pîl bîye. Coka bîye welatperwerêka xorine. Wexto ke 1991 de aye dest pê gerîlatîye kerd zanayêne ke seba şar û welatê xo bi cesaret û qerardarî vera îşxalkeran şerêkê tarîxî bikerê. Aye embaze û fermandara pîle Gulnaze Karataş (Bêrîtane) şinasnabî, tede gerîlatîye kerdbî û verê xo dabî Heftanînî. Têkoşînê Azadîye yê Kurdîstanî de a bîye pîl. Ame vatene ke aye koyanê Botan, Zagrosan, Dêrsim û Behdînan de seba azadîye kede daye, vazdaye, gonî rijnaye û bîye kabusê îşxalkeran.

Embaze Peymane Bagok heta şehadetê xo teşrîna peyêne ya 2019î qetî waranê gerîlayan ra nêvejîyaye. A bîye şerwan û fermandara pîle. Xeta PKK û PAJKî de bîye temsîlkara cuya azade, fedakare û wayîra ruhê azadî. Tek çimeyê aye erjê azadîye bîyî. Embaze Peymane hem şerwan û fermandara ARGK û HPGyî bîye, hem zî artêşbîyayîşê cinîyan YAJK û YJA-Starî rê bîye serkêşe. A wextêk Endama Meclîsê PAJKî bîye, Endama Konseya YJA-Starî de erk kerd û teşrîna peyêne ya 2019î de hêrişê hewayî de şehîd bîye. Têkoşînê aye do tim rayîrê ma roşnî bikero.

Embaza ma Agirî dewa Gordila ya Gabarî de dadîya xo ra bîya. A bi hîsanê welatperwerîye bîye pîl û hema domanîya xo de israr kerd ke tewra gerîlayan biba. La seba ke domane bîye waştişê ci ame redkerdene. A wexto ke ciwan bîye zî cade tewra gerîlayan bîye. Axir dest pê şerê xo yê raştikênî kerd û bêmabên nê şerî rê dewam kerd. A payîzê 1998î de bîye gerîla û payîzê 2019î de zî bîye şehîd. Aye koyanê Gabar, Besta, Zap û Cîlo de gerîlatîye kerde. Heskerdişê aye yê welatî, cinî û şarî û perwerîya ci ya bi Rayber Apoyî kerd ke a hîna zaf têkoşîn bikera. Aye bi hêzê PKK-PAJKî hîna bi aktîfî şer kerd, mîyanê Hêzanê Taybetan de cagirewt û nê esasî ser o gerîlatîye kerd.

Embaze Agirî Gabar Botanî ra heta Behdînan, Zagrosan û reyna heta Botanî xeylêk waran de fermandarîya gerîlayan kerde. Serra 2015î de aye herêmanê Gabarî de fermandarîya YJA-Starî kerde û Xoverdayîşê Xoîdarekerdişî yê Şirnexî de rolêko girîng kay kerd. Dima reyna agêraye Herêmanê Pawitişî yê Medya û heta şehadetê xo tîya de mende.

Embaze Çavrê Amed bi tesîrê welatperwerîye û bi tesîrê kekê xo yê gerîlayî 2011 de tewra gerîlayan bîye. Aye bi coşî dest pê cuya xo ya gerîlatîye kerd. Aye Avaşîn de gerîlatîye pratîze kerd û tîya de xeylêk çalakîyan de cagirewt. Rixmo ke serranê xo ra ciwan bîye aye mesuldarîyê xo ardî ca.

Serranê dergan ra dima Avaşînî ra waştişê xo ser o derbazê Vakurê Kurdîstanî bîye. Aye pa  embaze Peymane şer kerd û aye ra cuya azade, têkoşîn û xeylêk çîyanê bînan musaye. Aye xo ferasetê Rayberîye û şehîdan de zî xorin kerd. Embaze Çavrê Amed pratîk de jîhatêr bîye û tim bîye wayîra înîsîyatîfî.

Ma sey embazanê nê cinîyan ê çêran, qehremanan, azadan û şorişgêran pîlan soz danê ke armancanê înan do bîyarê ca. Ma sere de keyeyanê înan ra şarê xo yê welatperwerî rê serweşîye wazenê. Ma soz danê ke azadîya Rayber Apoyî bîyarê ca, welatê xo îşxalî ra bixelisnê û cinîyî îqtîdarê camêrdan ra bixelisnê. Ma do seba ney têkoşînêkê pîlî bikerê û qetî ser bikewê.''