Fermandarîya Pêroyî ya Yewinanê Pawitişê Cinîyan (YPJ) derheqê gefê Talibanî yê vera cinîyan ê afganan de eşkerayîyêke daye. 

Eşkerayîye de ame vatene ke rewşa peyêne ya Afganîstanî de cinî û domanî binê gefêkê pîlî de yê. YPJyî vist vîrî ke cinîyan ê kurdan Rojawan de binê sîwana YPJyî de xo rêxistin kerd, rêxistinîya xo û îdareyê xo awan kerdî, DAÎŞ bin kerd.

YPJyî vat: ''Cinîyê afganî zî sey ma eşkenê pê cewher û rêxistinîya xo bibê hêzê azadîye. Cinîyê afganî ganî wayîrê heqanê xo yê huqûqî, ekonomîk û sîyasîyan de isrardar bibê. Wayîrê esîlî yê Afganîstanî nê cinî yê. Ganî cinîyê afganî rêxistinîya xo bîyarê ca û pê hêzê xo vejîyê werte. Ma sey YPJyî paştî danê cinîyanê Afganîstanî Se beno wa bibo ganî cinîyê Afganîstanî xo pê îradeyê azadî rêxistin bikerê û têkoşînê xo vera hêzanê îqtîdarî dîyar bikerê. Ganî vîr a nêşoro ke hêvî serkewtişî ra hîna ercîyaye ya. Pê hêvî ma do ameyoxê xo awan bikerê. Qet yew hêz nêeşkeno vera rêxistinîya cinîyan vindero. Ma venga pêro cinîyanê dinya danê ke paştî bidê cinîyanê afganan. Ma bi baldarî rewşa cinîyan ê afganan teqîb kenê, paştdayîşê xo eşkera kenê û înan rê serkewtiş wazenê.''