Mehkemeya Berze bire dabî ke heqê qedexekerdeyî yê Hemşaredarê Wanî Abdullah Zeydanî wa bêrê betalkerdene. Zeydanî derheqê babete de ANFyî rê qisey kerd. 

Zeydanî ard ziwan ke bira betalkerdişî birêka sîyasî ya û vat: ''Mehkemeya Qanûnê Bingeyînî ferasetê xo binpay kerdo. No vera halê qanûnî yo la sîyasî yo. Xora derheqê mehkumîyetê ma de bira binpaykerdişî ya Mehkemeya Heqanê Merdimabn a Ewropa (MHME) est a. MHME bire daye ke dadgeran qestî ta vera ma bire daye û ma mehkum kerdê. Ganî na dosya ra ma beraet bikerdêne. La feraseto sîyasî wazeno şaredarîya ma bi dafikan xesp bikero. Şarê ma 31ê adare de cewabê qeyûman dabi û seba mazbataya xo xo ver da. YSKyî zî netîceya nê xoverdayîş û paşdtdayîşî de mazbata apey dabî şarê ma.''

Zeydanî îfade kerd ke bi mezgê nikayênî ancî yeno waştene ke şaredarîyê şarî bêrê xespkerdene û vat: ''La şarê ma ney qebul nêkeno. Şarê ma wayîrê demokrasî, huqûq û edaletî vejîyeno. Ma do îradeyê şarê xo bipawê. Ê wazenê ke kurdan teberê sîyasetî de verdê û heqê weçînayîşî xesp bikerê. Ganî şarê ma vera ney îradeyê xo bimojno. Kerdişê winayênî fayde nêkenê. Ganî verê dîyalog û muzakereyan bêro akerdene. Şaredarîyê ke ameyê xespkerdene ganî apey bêrê dayene.''