Serrgêra 25. ya şehadetê ci de Zîlane (Zeynepe Kinaci) xeylêk şaristananê Ewropa de ameye yadkerdene. 

Paytextê Fransa Paris de Zîlane û şehîdê menga hezîrane rayberîya Têgêrayîşê Cinîyan ê Kurdan ê Fransa de ameyî yadkerdene. Aktîvîte de nameyê TJK-E ser o Nûpelda Munzur, Keyeyanê Şehîdan ra Dayîke Têllî û Xanê Akdogan qisey kerd. Înan ard ziwan ke Zîlane vera polîtîkaya înkar û îmha qesasê Terteleyê Dêrsimî girewt. Dima derheqê Zîlane de sînevîzyonêk ame mojnayene.

Bajarê Kielî yê Almanya de zî cinîyan bi çalakîyêke Zîlane yad kerde û pare kerd ke Zîlane seba cinîyan ê kurdan û şarê kurdî wayîra girîngîyêka pîl a. Çalakîye pê slogananê 'Cinîye, Cuye, Azadîye', 'Şehîdî nêmirenî' qedîyaye.

Bajarê Baselî yê Swîsre de zî Dezgehê Keyeyanê Şehîdan pê aktîvîteyêke Zîlane yad kerde. Nameyê meclîsê Cinîyan ê Ronahî ser o qiseykerdişî ameyî kerdene û derheqê Zîlane de sînevîzyonêk ame mojnayene.

Bajarê Lavrio yê Yunanistanî de zî Têgêrayîşê Ciwanan ê Şorişgêran û TJK-E Kampa Lavrioyî de pankarta bi nuşteyê 'Zîlane Manîsfestoyê Azadîye ya', posterê Rayberê Şarê Kurdî û fotografê Zîlane akerdî. Çalakîye de ame vatene ke cinîyê kurdî xeta Zîlane ser o şinê. Dima Koma Kulîlên vejîyaye sehne ser.

Paytextê Swêdî Stockholm de zî Zîlane û 5 gerîlayê şehîdî yê YRKyî pê kombîyayîşêkî ameyî yadkerdene. Qiseykerdişan de ame vatene ke Zîlane pê çalakîya xo vera komplo, bêbextîye û teslîmbîyayîşî kurdan rê xetêka newîye awan kerde. Kombîyayîş de derheqê Zîlane û 5 gerîlayanê YRKyî de sînevîzyonêk ame mojnayene. Kombîyayîş de hunermendê cinîyî yê Amara vejîyayî sehne ser û seba rayraşîyayîşê 4ê temmuze veng ame dayene.