Şam de 6'ê Gulana 1996'î de vera Rayberê Şarê Kurdî Abdullah Ocalanî hêrişêkê bibomba amebi kerdene.  Gerîlayanê PKK’yî vera nê nê hêrişî sondê qesasî wend û nê sondî destpêk de Dêrsim de veng da. Gerîlaye Zeynep Kinaci (Zîlane) ya ke hîna serre û nêmêk bi mîyanê refê têkoşînî de bîye 30'ê Hezîrana 1996'î de çalakîya fedayîye viraşte. No dem de nameyê xeylî domanan Zîlane ame panayene. Hetê bînî ra xeylî gerîlayê ke tewrê mîyanê refê azadîye bîyê nameyê Zîlane na xo ro. Xeylî gerîlayan nameyê Zîlane girewt û mîyanê refê têkoşînî de cuya xo daye.

Zîlan Heleb (Elmaz Xelîle)

Zîlan Heleb (Elmaz Xelîle) a ke bi xo Efrînî ra ya, Heleb de ameya dinya, serra ke Zeynep Kinaci çalakîye viraşte tewrê mîyanê refê têkoşînê azadîye bîye. Zîlan Helebe vana: “Merdim rastîya ke ci ra gêrêno mîyanê refê PKK’yî de vîneno û şono ser ke no şima ra xeylî dûrî nîyo.” Zîlana ke bi tesîrê Zeynep Kinaci tewrê mîyanê refê têkoşînî bena Kanûna serra 2011 de bi rengê Bêrîtane, seba ke teslîmê artêşa Tirkî ya îşxalkare nêbo koyê Cûdî de xo zinarêk ra erzena  û tewrê mîyanê kerwanê şehîdan bena.

Zîlan Dêrsime (Arzû Bîlmeze)

Zîlan Dêrsime (Arzû Bîlmeze) Wan ra, serra 2007 de tewrê refê gerîlayan bîye. Armancê Zîlan Dêrsime tewr gird o bi ke bi hawayêko xurt xo şerê şarî yê şorişgêrî rê amade bikera. Zîlan Dêrsime da zanayene ke ê wazenê ciwanan rêxistin bikerê ke ê bieşkayê xo bipawê. Wareyanê Şapatan û Serero yê Xakurkê de 31'ê Temmuze 2016 de şer de şehîd kewte.

Zîlan Rûken Roboskî (Velîde Encu)

Zîlan Rûken Roboskî (Velîde Encu) Şirnex de ameye dinya, serra 2013 de tewrê mîyanê refê têkoşînê azadîye bîye. Bi kedêka bêhempaye wextêko kilm de bîye şerwanêka jîhate. Bi vatişê “Hemrayîya mîyanê PKK’yî cîya ya. Eke dinya û ruhê merdimî bêsînor bê, hemrayîya mîyanê PKK’yî zî bêsînor a. Gerîlayê PKK’yî seba dinya şensêkê gird ê û rûmet ê” dest bi Botanî kerd. 1'ê Temmuze 2017 de rîyê nêweşîyêka girane ra cuya xo vîndî kerde.

Zîlan Rojhate (Zîlan Omayîmîlane) 

Zîlan Rojhate (Zîlan Omayîmîlane) bajarê Makû yê Rojakewtena Kurdistanî ra ya. Vera polîtîkayanê kolonyalîst, asîmîlasyon û qirkerdişî serra 2007 tewrê mîyanê refê gerîlayan bena. Wextêk verê xo da Dêrsim û vat, “Ez teyna nêşona, ez hewn û xeyalanê xeylî hevalanê xo zî xo reyde bena Dêrsim.” Zîlan Rojhate serra 2016 Dersim de, dimayê çalakîya vera Qereqolê Tûrnuva de şer de cuya xo vîndî kerde.

Zîlan Dilxwaze (Songul Kolançe)

Zîlan Dilxwaze (Songul Kolançe) qezaya Cizîrî ya Şirnexî de amye dinya, hîna domanîya xo de polîtîkayê qirkerdişî, îşkence, înkar-asîmîlasyonê nas kerd. Zîlane vat, “Vera dişmenî timî kîn û nefret bî zereyê mi de, ez bi hîsê qesasgirewtişî ciwîya. Keyeyê mi de şehîdî estê, apê mi şehîd kewtî, pîyê mi ame destbendkerdene, bi ci îşkence ame kerdene, ez ameya girewtene, bi mi îşkence ame kerdene.”  Zîlane Cûdî de tewrê mîyanê refê têkoşînî bîye. Teşrîna Peyêna 2016 de tewrê mîyanê kerwanê şehîdan bîye.