Zîndanê Ûrmîye de sîyasetmedara kurde  Saada Khadirzadeha (32) ke digan a, vera bêhuqûqîye 9 rojî yo grevê vêşanîye de ya. Saada 7 mengî yo zîndan de tepişîyena û Dayîreyê Îstîxbaratî yê Pîranşarî nêverdeno ke a bi kefaletî vera bidîya.

Zîndanê Ûrmîye ra çimeyêkî/e Komeleya Heqanê Merdiman a Hengawî rê qisey kerd û vat: ''Mudirê zîndanî roja îne û şemeyî de Saada reyde qisey kerd û waşt ke wa grevî biqedîna.'' 

Saada Khadirzadeh 14ê teşrîna verêne de hetê Servîsê Îstîxbaratî yê Pîranşarî ra tepişîyaye û 25 rojan ra dima erşawîyaye Zîndanê Ûrmîye. Saade dosyayêka vengî ya Komeleya Heqanê Merdiman a Hengawî de wina vato: ''Ez zîndan de sey rehîne tepişîyena. Cipêrsayîş de mi rê îtîrafkerîye ameye ferzkerdene û hêzanê asayîşî ez tacîz kerda.''

Rixmo ke 7 mengî yo zîndan de ya Saada ne avûkatê xo dîyî ne zî babeta sûcdarîye musaye.  Zîndanê Ûrmîye de xeylêk tepişteyê kurdî yê nêweşî bi hawayêkê keyfî tepişîyenê. Rixmo ke doktorê zîndanî vanê ke hewceyê înan bi miqatbîyayîşêkê taybetî est o; selahîyetdarî nêverdenê ke tepişteyî bierşawîyê teberê zîndanî.