Fransa de tecrîd ame şermezarkerdene

Bajaranê Vîllîers le Bel, Mantes la Jolîe, Bordeaûx û Marsîlya yê Fransa de Kurdistanijî vejîjayî kuçeyan, tecrîd protesto kerd û bale ante grevanê vêşanîye ser.

Bajaranê Vîllîers le Bel, Mantes la Jolîe, Bordeaûx û Marsîlya yê Fransa de tecrîdê serê Rayberê Şarê Kurdî Abdullah Ocalanî ame şermezarkerdene û grevê vêşanîye ameyî silamkerdene.

VÎLLÎERS LE BEL

Vîllîers le Bel de rayberîya Merkezê Komelê Kurdan ê Demokratîkî de rayraşîyayîşêk ame viraştene. Çalakî de derheqê tecrîd û grevanê vêşanîye de vilawekî ameyî vilakerdene. Qiseykerdişan de bale anciyaye rewşa xoverdayoxanê grevê vêşanîye ser û ame vatene ke seba ke çîyêko xirab meqewimîyo ganî çalakîyî bêmabên dewam bikerî.

MANTLE LE JOLÎE

Bajarê Mantes la Jolîe de zî bi heman waştişî Kurdistanijî û dostê înan kuçeyan de bî. Çalakwanan rayraşîyayîşêk viraşt, bi sloganan azadîya Ocalanî waşte û xoverdayîşê Leyla Guvene û heme xoverdayoxanê grevê vêşanîye silam kerd. Çalakîye de ame vatene ke heta ke madya û rayapêroyî yê Fransa grevê vêşanîye megîrê rojdemê xo do çalakîyî dewam bikerî.

BORDEAÛX

Bajarê Bordeaûxî de zî Kurdistanijî vernîya banê şaredarîye de ameyî têhet û bi slogananê  “Biciwîyo Rayber Apo“ û Leyla Guvene anorê ma ya“ rayraşîyayîşêk viraşt û bi vilawekan derheqê grevanê vêşanîye de zanayîş da. Qiseykerdişan de ame vatene ke rewşa weşîya xoverdayoxanê grevê vêşanîye krîtîk a  û seba xurtkerdişê çalakîyan veng dîya.

MARSÎLYA

Marsîlya de zî bi seyan kesî ameyî têhet û bi çalakîyêk tecrîdê serê Ocalanî û bêvêngîya Ewropa şermezar kerdî. Çalakî de seba baleantişê grevanê vêşanîye vilawekî ameyî wendene. Rayapêroyî yê Ewropa ra ame waştene ke paştî bîdê xoverdayoxan û  polîtîkaya dirîye ya dewletanê Ewropa ameye protestokerdene.