Bajarê Bern û Zurîchî yê Swîsreyî û bajaranê Berlîn, Hîldesheîm û Bodensee yê Almanya de Kurdistanijan çalakîyî viraştî.

BERN

Bi vengdayîşê Têgêrayîşê Ciwanan ê Şorişgêrî, Kurdistanijî paytextê Swîsre Bern de, Bahnhofplatz de ameyî têhet û heta verê îstasyonê trene yê merkezî rayîrraşîyayîş kerd.

Çalakîya bêîteatîya sivîlî  bi wendişê vilawekanê serê grevê vêşanîye û tecrîdkerdişê Ocalanî ra dima qedîyaye.

ZURÎCH

Bajarê Zurîchî yê Swîsre de zî, Kurdistanijî bi vengdayîşê Meclîsê Cinîyan ê Berîtane taba dostanê xo Bahnhofstrasse de çalakîye viraşte.

Çalakîye de pankarta ke ser o nuşteyê “Parlamenterêk, Leyla Guvene vera tecrîdî grevê vêşanîye yê bêdem û bêagêrayîşî de ya” ameye akerdene û seba Ocalan û xoverrodoxanê grevê vêşanîye sloganî ameyî eştene. Çalakwanan reyna na babete ser o vilawekê bi Almankî vila kerdî.

BERLÎN

Paytextê Almanya Berlîn de dezgehê bawerîyananê cîya cîyayan; Cimatê Îslamî yê Kurdistanî (CÎK), Federasyonê Êzîdîyan (NAV-YEK) û Elewîyê ke girêdayîyê Însîyatîfê Azadîyî yê Dêrsimî yê mîtîngêk viraşt.

Bi pankarte û dowîzan bale ante xoverrodayîşê grevê vêşanîye ser û seba ke armancê çalakîye bêro famkerdene vilawekî ameyî vilakerdene.

Qiseykerdoxan vat,“Ganî ma bibê vengê waye û biranê xo yê ke grevê vêşanîye de yê û tu cara înan teyna canêverdîme.”

HÎLDESHEÎM

Bajarê Hîldesheîmî yê Almanya de zî, bi vengdayîşê Komunê Cinîyan ê Meryeme verê HBF'yî de çalakîya protestoyî ya bêvenge ameye kerdene.

BODENSEE

Kurdistanijê bajarê Bodensee yê Elmanya, Bûchhornplatzî de ameyê têhet û paştî dayê xoverrodayîşê grevê vêşanîye.

Çalakîye de temsîlkarê Partîya Çepe (Dîe Lînke) zî amade bîyî mabênê bajarî de xeylê vilawekî ameyî vilakerdene û çalakîya grevê vêşanîye ser o zanayîşî ameyî dayene.

Çalakwanan vengdayîşê CPT’yî  kerd ke nêbo hempare sucî û lezabez çîyêk bikero. Çalakwanan ge-ge sloganê “Ma merg nê, ma ciwîyayîş wazenê“ eştî.