Ewropa de semedê paştdayîşê grevanê vêşanîye Kurdistanijî û dostê înan kuçeyan de yê. Çalakîyan de yeno vatene ke waştişê xoverdayoxanê grevê vêşanîye waştişê înan o û sazîyanê Ewropa ra yeno waştene ke vera tecrîdî tê bigêrî.

MANNHEÎM

Bajarê Mannheîmî yê Almanya de, Kurdistanijan seba ke bale biancê serê xoverrodayîşê grevê vêşanîye çalakîya bêîteatîya sîvîle viraşte. Cinîyan posterê hemsereka KCD'yî û parlamentera HDP'yî ya Colemêrgî Leyla Guvene akerdî, fekê xo bi bant girewt û CPT û Konseya Ewropa şermezar kerdî. Çalakîye de  dowîzî ameyî akerdene û vilawekî ameyî vilakerdene. Çalakîya ke hetê Meclîsê Cinîyan ê Ronahî-Bêrîvane ra ameye  organîzekerdene zaf eleqe ante xo ser. Endamanê Meclîsê Cinîyan ê Ronahî-Bêrîvane  da zanayene ke çalakîyê înan do dewam bikerê.

STÛTTGARGT

Kurdîstanijanê bajarê Stûttgartî yê Almanya zî  seba ke bale biancê grevanê vêşanîye ser, vizêr veraşan çalakîyek  organîze kerde. Çalakîye de sloganê sey “biciwîyo Rayber Apo”, “Wa tecrîdê Îmralîyî bêro şikitene”,  “Ocalanî rê azadîye”, “Leyla Guvene anorê ma ya” ameyî eştene. Pankartê Leyla Guvene û Nasir Yagizî ameyî akerdene. Girseya şarî rayraşîyayîşêk viraşt û dima ra beyanat da çapemenîye.

VÎYANA

Paytextê Avûstûrya Vîyana de zî hetê Komela Cinîyan ê Kurdîan a Avesta ra çalakîyêk ameye organîzekerdene.  Cinîyan ê çalakwanan kincê sipîyî dayî xo ra û xo bi zîncîran girê da. Çalakîya ke verê Dêrê Dormî yê Stephanplatzî de ameye viraştene de posterê Ocalan û Leyla Guvene û alayê PKK'yî ameyî akerdene. Çalakîye de sloganê “Ma heme Leyla yê”, “Ewro roja paştdayîşî ya”, “Cinî Cuye azadîye”, “Ocalanî rê azadîye” ameyî eştene. Çalakîye bi vilakerdişê vilawekan qedîyaye.