Ewropa de çalakîyê  paştîdayîşê  grevanê vêşanîye vila benî. Vizêr reyna xeylî bajaran de Kurdistanijî û dostê înan vejîyayî meydanan û tecrîd protesto kerd.

MUNÎH

Bajarê Munîhî yê Almanya de Komunê Cinîyan ê Sara çalakîya rêzile organîze kerde. Çalakwanan grevê vêşanîye silam kerd û mesajê xurtkerdişê mucadeleyî dayî.

ISHOJ

Bajarê Ishojî yê Danîmarka de bi babeta tecrîdî kombîyayîşê şarî ame viraştene.  Kombîyayîşo ke sîyasetmedaro Kurd Hatîp Dîcle sey qiseykerdox tewrê ci bi, tecrîd, grevê vêşanîye û weçînitişê cayîyî gerîyayî dest.

GRAZ

Bajarê Grazî yê Awusturya de zî Kurdistanijî û dostê înan kuçeyan de bî.  Mîtîng de derheqê grevê vêşanîye de vilawekî ameyî vilakerdene û tecrîd ame protestokerdene.

KOLN   

Bajarê Kolnî yê Almanya de zî rayberîya cinîyan ê ciwanan de çalakîyêk ameye viraştene. Mîtîng de bale ancîyaye tecrîdê Îmraliyî û xoverdayîşê grevê vêşanîye ser û bêvêngîya Ewropa ameye şermezarkerdene.

DORTMÛND

Bajarê Dortmûndî yê Almanya de zî cinîyî meydanan de bî. Duîsbûrg û Essen ra zî Kurdistanijî tewrê çalakîye biyî û çalakwanê grevê vêşanîye silam kerdî. Çalakwanan veng da CPT û Neteweyê Yewbîyayeyî ke wezîfeyê xo bîyarî ca.

FREÎBÛRG

Bajarê Freîbûrgî yê Almanya de grevê vêşanîye yê 3 rojan yo ke Dergahê Elewîyan de semedê paştîdayîşê grevê vêşanîye yeno viraştene roja dîyine de bi çalakwananê neweyan dewam kerd. Meclîsê Cinîyan ê Nûda ra grûbêk çalakîwanî zîyaret kerdî.