Sergêrra 20. ya Komploya Mîyanneteweyîye ya serê Rayberê Şarê Kurdî Abdullah Ocalanî de rayraşîyayîşo derg o ke vizêr Basel de ver bi Strasbourgî ame destpêkerdene,  roja dîyine de bi tewrbîyayîşê 100 ra zêdetir kesê ke mîyanê înan de sîyasetmedar, temsîlkarê sazgehan û hunermendî estî, bi sloganê “Ma tecrîdî bişiknîme, faşîzmî birijnîme, Kurdistanî azad bikerîme” dewam keno.

Çalakwanî şewdir rew ra şaristanê Bartenheîmî yê Fransa de bi marşê ‘Hernepêş’î roja dîyine de ray ra şîyî. Wexto ke kuçeyan ra derbaz bîyî hemeyan pîya vat, “Ocalan rê azadîye”, “Biciwîyo xoverrodayîşê Zîndanan”.

Çalakwanan bi pankartan bale ante serê grevê vêşanîye yê ke bi rayberîya hemsereka KCD’yî Leyla Guvene dest pêkerdê û peyama “Tecrîd do bêro şiknayene” daye. Çalakwanan rayraşîyayîşî de derheqê tecrîdê Ocalanî û grevê vêşanîye de vilawekî kerdî vila kerî û mesajê xurtkerdişê xoverdayîşî dayî. Rayraşîyayîşî de zaf reyan slogane ''Terorîst Erdogan'', ''Dîktator Erdogan'' ameyî eştene. Çalakwanî rayraşîyayîşî 20 kîlometreyê ewroyî ra dima, ê biresê şaristanê Malhaûsî yê Fransa û game rayraşîyayîşî ya dîyine zî uca de tam bikerê.