Seba ke komploya mîyanneteweyîye ya vera Rayberê Şarê Kurdî Abdullah Ocalanî bêro protestokerdene û seba ke paştdarîye bidîyo xoverdayîşanê grevê vêşanîye,5 rojî naye ra ver Basel ra heta Strasboûrgî yew rayîrşîyayîş amebi destpêkerdene. Civaka Îslamîya Kurdîstanî ra Mele Mehmet Saît Torî û Merkezê Yewîya Komaleyanê Êzîdîyan ra Sabrî Atan ê ke  rayîrşîyayîşî de ca gênê  no derheq de beyanat da ANF‘yî.

Civaka Îslamîya Kurdistanî ra Mele Mehmet Saît Torî heta ewro çend rey, seba azadîya Ocalanî beşdarê rayraşîyayîşanê dergan bîyo. Serra 2012’î de Cenewre ra heta Strasboûrgî, serra 2014’î de Luksenbûrg ra heta Strasboûrg kewto rayraşîyayîşan. Torî 64 serre  yo û her çalakîya ke Ewropa de yena kerdene de ca gêno û bi çalakwanîya xo yeno şinasnayene.

MELE TORÎ: MA DO TECRÎDÎ QETÎYA QEBUL NÊKERÊ

Mele Torî hêvîyê azadbîyayîşê Ocalanî qetîya vîndî nêkerdê û derheqê rayraşîyayîşî de ca girewtene de wina vano:“ Ma seba ke tecrîdê serê Rayber Apoyî bişiknê û paştdarîye bidê xoverdayoxanê grevê vêşanîye kewtîme rayîrşîyayîş.  Ma nê tecrîdî qetîya qebûl nêkenîme. Tecrîd tena serê Rayber Apoyî de nê, şexsê ey de pêroyê şarê Kurdistanî de yeno caardene. Ma seba ke wina zanê na çalakîya xo kenê.

ZÎHNÎYETÊ DEWLETE, VERA OCALANÎ KERD VÎNDÎ

Torî, tecrîdî sey qewimîyayîşê teberê merdimahîye vîneno û wina vano: “Ne îslam de, ne bawerîyanê bînan de û ne zî demokrasî de çîyêko winasî çin o. Tecrîd vera merdimahîye yew suc o û ganî bêro wedaritene. No zîhnîyetê TC’yî û zîhnîyetê Tirk-îslamî yo ke Kurdan rê teda, îmxa, înkar, asîmîlasyon û qirkerdiş keno yo. Ma vera nê zîhnîyetî vejîyenê û ma do nê zîhnîyetî bişiknê. Heta ewro Şêx Saîd, Seyîd Riza, Qazî muhammed û 40 serre yo ke PKK‘yî vera nê zîhnîyetî şer kerd û no zîhnîyet şikit. Rayber Apo‘yî pêro dek û dolabê nê zîhnîyetî kerdî pûç û no sebeb ra binê tecrîdî de yo. Ewro pêroyê dinyaye de merdimî vejîye bi payan ser û Rayberî pawenê. No zî musneno ma ke zîhnîyetê dewlete kerdo vîndî.

OCALANÎ CÎYAYÎYÎ ARDE TÊHET

Ma no rayrAşîyayîş de pêro reng, bawerî û şaranê cîya-cîyayan têhet de vînenê. No serkewtiş saya Ocalanî yo. Cîyayîye rastîya merdimahîye ya, çîyo muhîm o yo ke merdim nê cîyayîyan bîyaro têhet. Birêz Ocalanî zî no kerd û no serkewtişê ey o.“

MA KE MUSLUMANÊ GANÎ KURDAN HET DE CA BİGÎRÊ

Torîyî bale ante grevanê vêşanîye ser zî û wina va: “Dawaya Leyla dawaya ma ya zî. Dawaya Rayber Apoyî zî dawaya ma ya. Dîno îslamî, vera zulmî yo, vera zulim û koletîye îsyan o. Çi heyf ke ewro Kurdî sey koleyan ênê dîyayene û vera naye bêvengîye esta. Ma ke muslumanîme ganî zulmê serê Kurdan qebûl mekirê û înan het de ca bigîrê.“

ÊZIDÎYÎ: AZADÎYA OCALANÎ AZADÎYA CÎYAYÎYAN A

Merkezê Yewîya Komaleyanê Êzidîyan ra Sabrî Atanî zi çalakîya rayraşîyayî ya xo ya 2’yîne de ca gêno. Naye ra ver serra 2015’î de rayraşîyayîşê Luksenbûrg-Strasbourgî de ca girewto. Atan 54 serre yo û roja verî ra nat rayraşîyayîşî de seba azadîya Ocalanî talebanê xo sey slogan ano ziwan. Atan derheqê rayraşîyayîşî de wina qisey kerd: “No rayraşîyayîş, seba Êzîdîyan zaf bimana yo.No rayraşîyayîş de ma şexsê Rayber Apoyî de azadîya pêroyê merdimahîye taleb kenê. Azadbîyayîşê Rayber Apoyî êno maneyê azadbîyayîşê pêro bawerî,mezheb û nasnameyanê cîya cîyayan.“

RAYBER APOYÎ ESTBÎYAYÎŞÊ MA DINYAYE RÊ DA QEBÛLKERDENE

Atanî va seba ma Êzîdîyan Rayber Apo zaf hêcayo û wina dewam kerd: “ Rayber Apo, vera sîstemanê ke ma Êzîdîyî qebûl nêkenê vejîya û sere wedart, estbîyayîşê ma pêroyê dinyaye rê da qebûlkerdene. Rayber Apo seba azadîya merdimahîye mucadele keno. Bi taybetî zî seba ma Êzidîyan zaf zaf muhîm o.

MA ÊZIDÎYÎ DO XOVER BIDÊ

Ewro bi serkêşîya Leyla Guvene, xoverdayîşê grevê vêşanîye dewam kenê. Ewro Şengal de zî, seba Rayber Apoyî xoverdayîşê grevê vêşanîye Yenê kerdene. Ma baş zanê ke, heta tecrîdê serê Rayber Ocalanî  nêro wedaritene,şar û bawerîyî zî nêbenê azad. Ma Êzidîyî pêro xoverdayîş û çalakîyê ke seba şikitişê tecrîdî yenê kerdene de ca gênê û wazenê ke rojê aver tecrîd bêro wedaritene.“