Kassel de, vera tecrîdê serê Rayberê Şarê Kurdî Abdullah Ocalanî, 26 rojî yo ke greve vêşanîye dewam keno.  Çalakwanan semedê xurtkerdişê mucadeleyî veng da.

SEMEDÊ SERKEWTIŞÎ GANÎ ÇALAKÎYÊ XURTÎ BÊRÎ VIRAŞTENE

Peyamê çalakwan Omer Bagdûrî wina yo: ''Ez Cizîra Botane ra ya, 54 serrî ya û 16 serrî yê xo ra nata Almanya de ciwîyena. Ma 26 rojî yo ke xover danê û zerrîweş ê. Moralê ma zî zaf ca de yo. Nê çalakîyî û xebatî prosesi  rê sey cewab nîyê û kêmî yê. Proses ma ra wazeno ke sey serranê 90’an ma tê bigêrê û çalakîyan bivirazê. O wext bi hezaran kesî beşdarê mîtîngan û çalakîyan bîyêne. Ma şarê xo ra wazenê ke wa sey ruhê ey wextî tê bigêrê. Bêşik o ke çalakîyî û organîzasyonî yenê kerdene,la bes nîyê. Kurdan mejîyê xo de hezar welatî awan kerdê, destkewteyê ci zaf zaf ê. Tena çîyo ke kêmî mendo, azadîya Rayber Apoyî ya. Ma eşkenê naye zî bîyarê ca û bibê serkewte.”

HÎNA KE KES ŞEHÎD NÊBÎYO, GANÎ ŞAR VENGÊ XO BERZ BIKO

Peyamê çalakwan Cemal Mehmûdî wina yo: “Nameyê mi Cemal Hecî Mehmûd o. Ez Kobanê ra ya. Ez zî seba ke Leyla Guvene reyde nêkewta çalakîye û erey kewta xemgîn a. Na kemasîya ma ya. Ma ewro kewtê roja xo ya 26’ine. Moralê ma ca de yo û ma biqerar ê. Şarê ma yê Kasselî zî paştdarîye dano ma. Ma şarê xo ra wazenê ke wa hîna ke embazê ma şehîd nêkewtê, çalakîyanê xo bikerê zêde û vengê xo bikerê berz. No mucadeleyêko bianor o. Goreyê dînî  zî vanê kesê ke seba welat, erd û anorê xo bi mucadeleyî mirenê benê şehîd, no mucadeleyê ma yê pîrozî de zî eynî konsept ameyo girewtene. Ti ke seba welatê xo, seba erde xo, seba rayberê xo ke bimirê, bena şehîd. Ez pêroyê Kurdan ê bianoran rê silamê xo vana. Ganî her kes dest ra çi ke yeno bikero û paştdarîye bido nê mucadeleyî.”