Ciwanê Kurdî Yusûf Îbayo ke bajarê Toronto yê Kanada de grevê vêşanîye de yo, bi wesîleya serrgêra komploya mîyanneteweyîye vat, “Ma  rayîr nêdanê komployan, bi xoverrodayîş ma do vernîya înan bigêrê”.

Îbayî ard ziwan ke grevê vêşanîye yê hemsereka KCD’yî û parlamentera HDP’yî ya Colemêrgî Leyla Guvene ke vera tecrîdî dest pêkerdibi, wextêkê kilmî de kewt rojdemê dinya.

Ciwano Kurd o bi nameyê Yusûf Îba, bajarê Toronto yê Kanada de 36 rojî yo grevê vêşanîye de yo. Îba  rixmê persanê xo yê weşîye bi hawayêkê qerardarî çalakîya xo domneno.

Seba çalakîyanê vera komploya mîyanneteweyîye veng kerd ke her cayê Kurdistanî de Kurdistanijî bikewê waran û çalakîyan. Îbayî wina dewam kerd, “Ez grevê vêşanîye nê demî de zaf bimana û muhîm vînena. Seba ke ney wedartişê tecrîdkerdişê Ocalanî kerdo xo ver muhîm o. Hevala Leyla reyde dest pêkerd, bado Nasir Yagizî û ma cehd kenê bidomnê.”

Îbayî ard ziwan ke, tecrîdê serê Ocalanî bi şeklêkê mutleqî biqedîyo, o wext na çalakîye do biqedîya û vat, “Şexsê Rayberîya şarî de o şar bi temamî ameyo tecrîdkerdene. Rewşêka winasîye de şarê ma ancax bi xoverrodayîşê topyekûmî eşkeno cewabê ci bido.”

Îbayî dewamê ci de vat, “Ma do seba şermezarkerdişê komploya 15'ê Sibate bikewê waran. Ez do siba pankarta bi nuşteyê ‘Ocalanî rê azadîye‘ bigî û 5-6 saetî rayraşîyayîşêkê dergî bika û bado ez do Yonge Vebloorî de girseyî reyde bêra têhet û tîya de ma pîya tecrîdî û komploye şermezar bikerê. Ma do bibê ê kesê ke tarîxî xo bi xo nusenê.“