Îstanbul û Adana de rîyê protestoyanê tepiştişê Şaredarê Bajarê Pîlî yê Îstanbulî Ekrem Îmamogluyî ra xeylê kesî ameyî destbendkerdene.

Îstanbul demsaetanê serê sibayî, rewî ra polîsan eşt xeylê keyeyan ser. Avukat Deniz Demirdogenî hesabê xo yê medyaya sanale ra pare kerd ke xeylê kesî ameyî destbendkerdene.

Destbendkerdişî bi îdîaya ‘muxalefetê vera qanûnê rayraşîyayîşan û çalakîyan’ ameyî kerdene.

Adana de zî grûba ke tepiştişê Ekrem Îmamogluyî protesto kerd, polîsan pê awa tazîkîn, mermîyanê plastîk û bombayanê qazî hêrişê ci kerd. Xeylê kesî bi derbkerdişî ameyî destbendkerdene.

Îzmîr de zî  sîyasetmedar, avûkat û muzîsyenî zî tede xeylê kesî ameyî destbendkerdene. Kesê ke ameyî destbendkerdene nameyê înan wina yê: Didar Gul, Soner Kuçukerguler, Şukrane Yaren Tuncer, Gokhan Erdem, Sema Nur Demirtaş, Berk Çukurcam, Mehmet Duman, Gulşene Sude Avci, Gursel Akbaba, Ozkan Yucel.