Grevê vêşanîye yê bêdem-bêagêrayîşî yê Strasbourgî yo ke seba wedartişê tecrîdê serê Rayberê Şarê Kurdî Abdullah Ocalanî yeno viraştene rê zîyaretî dewam kenî. Kurdistanijê ke çalakwanan zîyaret kenî vanê ke bi xoverdayîşî do tecrîd bêro şikitene.
Çalakîya Strasbourgî ke ewro kewta roja xo ya 48. vizêr reyna zîyaretkarê ci bibî. Bajarê Goppîngenî yê Almanya ra endamê PYD’yî Abdîn Khorşîd zî tede endamanê Meclîsê Şarî ra grûbêk çalakwanî zîyaret kerdî.
Abdîn Khorîdî ke bi nameyê meclîsî qisey kerd, vist vîrî ke şarê Kurdî demêko muhîm ra ravêreno û va: ‘‘Ganî şarê ma yê Ewropa 24 saet nobete de bo. Ganî şarê ma yo welatperwer her ca de vejîyo kuçeyan û vengê xo dezgehanê mîyanneteweyîye rê bido eşnawitene. Eke şar xoverdayîşî rê wayîr bivejîyo, do tecrîd bêro şikitene. Ma do bi xoverdayîş ser bikewê.‘‘
