Konferans 9ê sibate de roja yewşemeyî hetê Şaredarîya Calenzeno ra ame serûberkerdene. Şaredar Ricardo Prestiniyî konferans de qisey kerd û vat: ''Ma şerê dewleta tirke yê vera Rojawanî şermezar kenê.''

Prestiniyî pare kerd ke seba ke no ler bêro vindertene paştdayîşê xo yê bi Rojawanî do dewam bikerê û venga dewleta tirke da ke hêrişê xo wa vindarna.

Selahîyetdaranê sendîkata ARCI Manfreddî Sauroyî zî ard ziwan ke hêrişê vera Rojawanî yenê manaya şerê vera sosyalîstan. Sauroyî eşkera kerd ke sîstemê konfederalîzmê demokratîkî yê Rojawanî seba Ewropa modelê xelisnayîşî yo û vat: ''Ganî ma nê sîstem bipawê û nêverdê ke Erdogan û cergê ci nê sîstem bivisnê destê xo.''

Nameyê Komîteya Kurde zî Erol Aydemîr qisey kerd û vat: ''Dewletê neteweyî yê ke tewrê nê şerê bêexlaqî bîyî ganî bizanê ke şarê Rojawanî bingeê  konfederalîzmê demokratîkî de têkoşînê xo heta peynî dewam bikerê.''

Serekê Heyva Sore-Îtalya Alîcan  Yildizî zî vist vîrî je dewleta tirke Rojawan de tewr tay 400 hezar kesî neçare mendî ke koç bikerê. Yildiz seba pîlkerdişê paştdayîşî veng da.

Amadekar û qiseykerdoxanê konferansî bi wesîleya serrgêra 21. ya komployê mîyanneteweyî pare kerd ke ê do saete 14:00 de Piazza Rebublica ya Roma de beşdarê rayraşîyayîşî bibê.