Ewropa de vera tecrîdê Îmraliyî çalakîyî bêmabên dewam kenî. Vizêr reyna xeylî bajaranê Fransa, Almanya û Îtalya de Kurdistanijan û dostanê înan tecrîd protesto kerd.

BİELEFELD

Bajarê Bielefeldî yê Almanya de bi çalakîyêk tecrîd ame protestokerdene.  Çalakwanan grevê vêşanîye silam kerdî û bêvengîya Ewropa şermezar kerde.

FREIBURG

Bajarê Freiburgî yê Almanya de zî grûbêk seba 3 rojan dest bi grevê vêşanîye kerd. Bi nameyê çalakwanan pîyê di şehîdan Alî Akanî qisey kerd. Akanî bale ante muhîmîya rolê Ocalanî ser û vat ke heta ke tecrîd bêro şikitene  ma do çalakîyanê xo rê dewam bikero.

LYON

Bajarê Lyonî yê Fransa de zî rayberîya Komela Kulturî ya Mezopotamya de çalakîyêk ameye organîzekerdene. Çalakîya ke sey bêîtaatîya sivîle ameye viraştene de  pankartê ‘Ma tecrîdî bişiknê, faşîzmî birijnê‘ ame akerdene û derheqê tecrîd û grevanê vêşanîye de vilawekî ameyî vilakerdene.

TORÎNO

Bajarê Torîno yê Îtalya de zî Kurdî û dostê înan ê Îtalyanî bi çalakîyêk tecrîdê serê Ocalanî protesto kerd. Temsîlkarê xeylê rêxistin û partîyanê sîyasîyan ê Îtalya tewrê çalakîye biyî û tecrîdê Îmraliyî şermezar kerd.