Bajarê Hildesheimî yê Almanya, Papperswilî yê Swîsre û Creilî yê Fransa de semedê paştîdayîşê grevanê vêşanîye yê bêdem-bêagêrayîşî yê ke vera tecrîdkerdişê Rayberê Şarê Kurdî Abdullah Ocalanî yenî domnayene, çalakîyî ameyî viraştene.
Ewropa de çalakîyê ke semedê paştîdayîşê grevanê vêşanîye yê ke semedê wedartişê tecrîdê serê Rayberê Şarê Kurdî Abdullah Ocalanî yenî viraştene, dewam kenî.
HILDESHEIM
Bajarê Hildesheimî yê Almanya de Meclîsê Cinîyan ê Meryeme bi şîarê ‘Ma tecrîdî bişiknê, faşîzmî birijnê‘ çalakîya paştîdayîşê grevê vêşanîye organîze kerde. Çalakî de bale ancîya serê tecrîd û grevê vêşanîye û ame vantene ke goş bidenê vengê ma, siba beno ke zaf erey bo. Bado zî cinîyan Leyla Guvene rê mesajê paştîdayîşî şawitî.
RAPPERSWIL
Bajarê Rapperswilî yê Swîsre de zî çalakîya paştîdayîşê grevê vêşanîye ameye viraştene. Çalakîya ke hetê Komunê Şarî yê Rapperswilî ra ameye organîzekerdene, xeylî kesî tewrê ci bîyî. Çalakwanan derheqê tecrîdê Îmraliyî û grevanê vêşanîye de vilawekî vila kerdî û waşt ke dezgehê Ewropa vera naye vengê xo bivejî.
CREIL
Bajarê Creilî yê Fransa de zî bi heman waştişî Kurdistanijî û dostê înan kuçeyan de bî. Çalakî de şexsê Guvene de çalakwanê grevê vêşanîye ameyî silamkerdene û mesajê paştîdayîşî ameyî dayene.
