Ewropa çalakîyê şermezarkerdişê tecrîdî û paştîdayîşê grevanê vêşanîye vila benî. Vizêr Reyna Almanya û Swîsre de Kurdistanijî û dostê înan kuçeyan de bî.

BERLÎN

Paytextê Almanya Berlîn de zî aktîvîstanê Têgêrayîşê Ciwanan ê Şorişgêrî televîzyonê ZDF’î de çalakîya bêîtaatîye ya sivîlî viraşte.  Çalakwanan bêvengîya medyaya Almanya şermezar kerde û derheqê tecrîdê serê Ocalanî û grevanê vêşanîye de dosyayêk daye temsîlkaranê kanalî.

ESSEN

Bajarê Essenî yê Almanya de zî bi heman waştişî aktîvîstanî Têgêrayîşê Ciwanan ê Şorişgêrî û  JXK’yî  kanalê WDR’yî de çalakîya bêîtaatîye ya sivîlî viraşte. Çalakwanan derheqê waştişanê xoverdayoxanê grevê vêşanîye de dosyayêk teslîmê berpirsîyaranê kanalî kerde. Reyna dosyayêk zî Radîo ya Essenî rê ameye dayene.

CENEVRE

Bajarê Cenevre yê Swîsre de vernîya Ofîsê  Neteweyê Yewbîyayeyî (NY) yê Cenevre de çalakîyêk ameye organîzekerdene. Çalakî de xoverdayoxê grevê vêşanîye ameyî silamkerdene û bêvêngîya CPT û NY’yî yê vera tecrîdê Îmraliyî ameye şermezarkerdene. Ame vatene ke heta ke waştişê çalakwananê grevê vêşanîye nêro ca do çalakîyî dewam bikerî.

BERN

Paytextê Swîsre Bern de zî Federasyonê Elewîyan ê Demokratîkî  semedê paştîdayîşê grevê vêşanîye çalakîyêk organîze kerde.  Çalakîya ke bi şîarê veng bide vengê Leyla ame viraştene de derheqê xoverdayîşê grevê vêşanîye de xeylî vilawekî ameyî vilakerdene.