Parlementoyê Swêdî de vizêr derheqê demokrasîya Tirkîya  û qedexeyê vera PKKyî û meseleya kurdî de konferans ame kerdene. Xeylêk wekîlê partîyanê cîya cîyayan ê Swêdî û temsîlkarê dezgehanê komelê sîvîlî tewrê konferansî bîyî.

Qiseykerdişê akerdişî hetê Wekîlê Partîya Liberalî Fredrîk Malmî ra ame kerdene. Malmî hêrişê îşxalî yê dewleta tirke yê vera Kurdîstanî  şermezar kerdî.

Wekîlê HDPyî Hîşyar Ozsoy zî vat: ''Tirkîya de nika heme welatî rê zext yeno kerdene. Bitaybetî Kurdîstan de yeno waştene ke  îradeyo polîtîk û rewşa nasnamekî  bi temamî  bêro çînkerdene. Erdogan û şîrîkanê ci vîjnayîşê peyênî de zaf rey vînî kerdî. Her kes zano ke partîya ke eşkena verê dîktatorîya AKP-MHPyî bigêro HDP yo. Wina yew wexto ke şer bi hewayêkê giranî qewimîyeno de Rayberê PKKyî Abdullah Ocalan binê tecrîdê giranî de yo.  Dewlete qetî semedê qedînayîşê şerî nêzdîyê muzakeran nêbena. Wedartişê tecrîdê serê Abdullah Ocalanî semedê haştîye gamêka pêt a. La ê semedê îqtîdarê xo şerî danê domnayene. Dewleta tirke têna vera PKKyî nê vera heme kurdan şer kena. Seba ke destkewteyanê kurdan çîn bikero hêrişê Iraqî kena. Eşkera vanê ê Iraq û Sûrîye de zî statuyê kurdan nas nêkenê û semedê çînkerdişê naye destê înan ra çi bêro keno. Barzanîyo ke heta 2014 seba ke lîsteya terorî de bê destûrîya taybete neêşkayêne şiro Amerîka ewro eynî muameleyî ma rê keno. Kam ke vera nê bêveng bimano  eşkera paştî dano kerdişanê dewlete.''

Avûkat Jan Farmo zî nê vatî: ''Kurdî hetê dewlete ra sey terorîstî yenê vînayene. Heta ke Ewropa de pênasê terorîzmî nêbedilîyo teşhîrkerdişê Tirkîya ra tiway nêvejîyeno. Rixmo ke PKK Ewropa de şîdet nêkeno lîste de ca geno.  Seba ke PKKyî bibedilnê kerdo mîyanê lîste. 2006î ra nata seba ke PKK lîste ra vejîyo û sîyasetmedarê kurdî nêrê krîmînalîzekerdene ma têkoşînê huqûqî rayra benê. Ma çend raştîyan vejê werte zî Amerîka û Ewropa pê zorî nêverdanê lîste ra bêro vetene. Ma vanê ke meseleya terorîzm nê şerêkê zereyî est o û seba ke verê nê şerî bêro girewtêne ganî Ewropa nêzdîbîyayîşê xo yê xeletî yê vera PKKyî bibedilno.''

Endamê Konseya Rayberdişî ya KCKyî Zubeyîr Aydar zî wina qisey kerd: ''Komara Tirkîya wextê ronayîşê xo ra estbîyayîşê kurdan înkar kerd, bi şîdetê pîlî her çîyê kurdan heta qiseykerdişê kurdkî qedexe kerd. Vera nê kurdanê tim têkoşîn kerd bi desan rey sere wedarit. Goreyê qeydanê dewlete serewedatişo ke serkêşîya PKKyî de bi serewdaritişê 29. o. Kurdan rê bê serewedaritişî yewna rayîr nêmendo. Têgêrayîşê Azadîye yê Kurdîstanî çend bi pîl Tirkîya zî semedê vergirewtişê ci teberî ra paştdayîş girewt. Mutefîkanê Tirkîya yew bi yew PKK qedexe kerd.  Nê zî verê mexdûrîyetê bînî akerd. Heme kurdî bîyî mexdûr. Tewr zaf zî Almanya de rîyê  qedexeyê PKKyî ra kurdî tengayî ancenê.

Swêd de  qetilkerdişê Serekwezîr Olof Palme yo ke dostê ma bi, erzîya milê PKKyî. Ma mexdûrîyetê pîlî ciwîyayî. Badê 34 serran ame vatene ke eleqeya PKK û kurdan pê çîn a. La heta a roje xora çîyê ke bibê bîbî. Kurdî semedê nasnameyê xo welatanê Ewropa de binê zexte de yê. Qedexeyê vera PKKyî têna vera yew partî sînordar nîyo. Yew şar yeno mexdûrkerdene. Na lîste her çîya ver verê çareserî û haştîye gena. Paştî dana şerwaştoxan. Dîktarorîya Erdoganî sîyasetmedaranê kurdan sey têrorîstî name kena û erzana zîndan. Bodrumanê Cizîre de 177 kesî sey terorîstî name kerdî û vêşnayî. Reyna teberê sînorî de zî hêrişê kurdan kenê.Bajarê Rojawanî îşxal kerdî. Dewleta tirke sûcê merdimîye û şerî kena la nê sey têkoşînê vera terorîzmî ramojena.Reyna vera Şingal û Mexmûr hêrişê înan dewam kenê. Başûrê Kurdîstanî ser o bombayan varnena. Seba ke paştîya dewleta tirke Ewropa û Amerîka ra pêt a hêrişanê xo tim zafêr kena. Seba ke PKK lîsteya terorî de yo, Erdogan naye ra paştî geno.

PKK semedê azadîya şarê xo têkoşîn keno. Sûcdarkerdişê PKKyî huqûqî û ehleqî nîyo. Senî ke Ukrayna vera Rûsya têkoşînê heqdarî dana, şarê kurdî zî têkoşînê xo yê vera îşxalê tirkî de heqdar o. Têkoşînê vera DAÎŞî de bedelo tewr pîl PKKyî da la lîsteya Ewropa de PKK û DAÎŞ têhet de yê. Kamyew wîjdan nê qebul keno? Têgêrayîşê Azadîye yê Kurdîstanî wazeno meseleya kurdî bi dîyalogî çareser bikero la Tirkîya semedê şerî kerdo xo çeng. Ma nika parlementoyê Swêdî qisey kenê. Pawitişê şarê kurdî hukmatê Swêdî ra est ê. Ma zî tîya ra veng danê, seba ke PKK lîsteya terorî bêro vetene, hetkarî bikerê.''