Kurdîstanijî do serrgêra ci ya 101ine de Peymana Lozanî protesto bikera. Komîteya Rêxistina Çalakîyan bale ante hêrişanê îşxalî ser û venga pêro kesan da ke tewrê rayraşîyayîş û mîtîngê 27ê temmuze bibê.
24ê temmuza 1924î de bi Peymana Lozanî Kurdîstan çar parçeyî amebi kerdene. Kurdîstanijî do serrgêra ci ya 101ine de Peymana Lozanî protesto bikera.
Şaristanê Lozanî yê Swîsre de YNK, Tevgera Goran, Rêveberiya Xweser a Rojava, KCDK-E, TJK-E, FEDA, KKP, PJAK, PYD, ESU, PÎK, NAV-DEM, Enstîtuya Kurd a Swîsreyê zî tede 36 dezgeh û rêxistinanê kurdîstanijan seba protestokerdişê Peymana Lozanî eşkerayîyêka hempare daye.
Komîteya Amadekarîyan kombîyayîşî ra dima eşkerayîye daye çapemenîye.
Nameyê komîte ser o Hemserekanê Konseya Demokratîke ya Kurdan a Swîsre (CDK-S) Cemal Ozdemîrî û Dîlane Çetînkaya da zanayene ke 27ê temmuze de seba protestokerdişê Peymana Lozanî mîtîng û rayraşîyayîş do bêrê kerdene.
Dîlane Çetînkaya dîyar kerd ke ê do qetî îşxalê dewleta tirke yê vera Başûrê Kurdîstanî qebul nêkerê û vat ke ganî kurdî bi wesîleya serrgêra 101ine ya Peymana Lozanî vera îşxalî yew bibê.
Cemal Ozdemîrî vat: ''Ma venga şarê xo û dostanê xo danê ke bêrê ma na peymane protesto bikerê.''
27ê temmuze de rayraşîyayîş Lozan de, saete 13.00 de adresê Place des Pionnieresî de do dest pêbikero û heta warê Chateau D'ouchyî dewam bikero. Rayraşîyayîşî ra dima mîtîng zî do tîya de bêro kerdene.
