Bajarê Swîsre Basel de seba ke paştdarîye bidîyo Can TVyî yew şewe ameye organîzekerdene. Hemserekê HDPyî Sezaî Temellî û Parlamenterê HDPyê Antalya Kemal Bulbul û 2000 kesî beşdarê şewe bîyî.
Şewe bi gulbang dayîşê Pîr Huseyîn Bîldîkî dest pêkerde û çilayî ameyî tafînayene, loqmeyî ameyî vilakerdene.
Şewe de bi nameyê Federasyonê Elewîyan ê Demokratîkî (FEDA) yê Swîsre Songul Çelîke, bi nameyê Hereketê Mereşî Azîz Tunç û bi nameyê însîyatîfê Dêrsimî Kazim Kabakçiyî qisey kerd û peyamê paştdarîye dayî Can TVyî. Hemserekê FEDAyî Bedran Yildirim û derhênero pêroyî yê Weşanê Can TVyî Zeynel Gulî zî şewe de qisey kerd û beşdarwanî selam kerdî.
Şewe de seba ke bale biancê tecrîdê Rayberê Şarê Kurdî Abdullah Ocalanî ser, Leyla Guvene ya ke 75 rojî yo grevê vêşanîye de ya, reyna Hepisxaneyanê Tirkîya de, Strasbourg, Hewlêr, Galler û Kanada de grevê vêşanîye ke dewam kenê ameyî silamkerdene û paştdarîye ameye waştene.
Hemserekê HDPyî Sezaî Temellîyî, parlamenter Kemal Bulbulî ra dima qiseykerdişêk kerd û va tecrîd do bêro şikitene. Temellîyî wina va: “31ê Adare de weçînitiş do bibo. Ma Tirkîya de restîme her kesî. Ma tewr zêde Elewîyan de ameyîme têhet. Ma Elewîyan ra reye nêwazenîme. Ma wazenîme pîya sîyaset bikîme û pîya mucadele bikîme.“
Temellîyî qisa arde Leyla Guvene ya ke 75 rojî yo grevê vêşanîye de ya ser û va, “Ewro sey Leyla Guvene Hewlêr, Ewropa û hepisxaneyanê Tirkîya de xeylî hevalê ma grevê vêşanîye de yê. Ma eke, haştîye wazenîme, demokrasî wazenîme ganî ma tîya ra pêroyê xoverdayoxan selam bikîme. Hêz bidîme mucadeleyê înan û vengê înan rê bibîme veng. Çunke tecrîd bi xo şer o, zulm o. Ya tecrîd ya demokrasî, ya tecrîd ya haştîye.“
Şewe de Koroya Domananê Dêrsimî, hunermendê Mereşî, Mercan Erzîncane, Hasan Saglam, Abdal Haluk Tolga vejîyayî sahneye ser.
