Serrgêra 20’ine ya komploya mîyanneteweyîye de, sîyasetmedar, temsîlkarê sazîyan û hunermendî zî tede 150 kes do bi slogana “Ma do tecrîdî bişiknê, faşîzmî birijnê, Kurdistanî azad bikerê” bajarê Baselî yê Swîsre ra heta bajarê Strasboûrgî yê Fransa rayra şirê. Rayraşîyayîşo derg do mabênê 9-15’ê Sibate de bêro viraştene.

Kongreya Cimato Demokratîk a Kurdistanijanê Ewropa (KCDK-E) çalakîye organîze kena. Rayraşîyayîş do 9’ê Sibate saet 11 de bajarê Baselî de bi tewrbîyayîşê bi hezaran kesan bi mîtîngêk dest pê bikero. Pîya bi 150 rayraşîyayoxanê rayîrê dergî, do Kurdistanij û dostê înan zî bi hawayêkê xurtî tewrê roja ewilêne ya rayraşîyayîşî bibê.

Komîteya hadrekerdox a rayraşîyayîşî ra û endama Têgêrayîşê Cinîyan ê Kurdan Newroz Serhate derheqê rayraşîyayîşî da hayîdarîyî dayî ANF’yî û vat,hadreyîyê teknîkîyî heme qedîyayê. Newroz Serhate ard vîrî rayraşîyayîş wina wextêk de yeno viraştene ke seba qedînayîşê tecrîdê serê Ocalanî xoverdayîşê grevê vêşanîye dewam kenê, naye ra zî zaf muhîm o. Serhate vat rayraşîyayîş do 7 rojî dewam bikero û do her game de waştişê wedartişê tecrîdê serê Ocalanî bîyarê ziwan.

BIROJE RAYRAŞÎYAYÎŞ, ŞAN DE ZÎ PANEL

Newroz Serhate dewamê qiseykerdişê xo de vat rayraşîyayîş do zafane merkezanê bajaran de serê rayîranê bingeyênan de virazîyo, biroje do rayra şirê, şan de zî pîya bi programanê kulturkîyan derheqê tecrîdî û prosesê sîyasîyî de panelan virazê.

Serhate vat: “Verê heme çîyî amacê rayraşîyayîşî azadîya fîzîkkîye ya Rayberê ma ya. Senî ke slogana rayraşîyayîşî de zî ame vatene, amacê ma perçekerdişê tecrîdê Îmraliyî yo, amacê ma viraştişê şertanê cuya azade ya Rayberê ma yo. Ma bi rayraşîyayîşî wazenê bala rayapêroyîye biancê grevanê vêşanîye ser.”

 ‘GANÎ PEYNÎ BI BÊVENGÎYE BÊRO ARDENE’

Newroz Serhate vat: “Rayraşîyayîşê ma do bibo qismêkê xoverdayîşê nikayênî. Sere de halê Leyla Guvene, halê weşîye yê embazanê ma resayo merheleyêka krîtîke. Xoverdayîş bi bawerî dewam keno, la hem zereyê rayapêroyîye de û hem zî wareyê mîyanneteweyîyî de bêvengî esta. Rayraşîyayîş heman wextî de hemverê na bêvengîye de yo.” 

XOVERDAYÎŞÊ AZADÎYE YÊ KURDAN

Peynîya qiseykerdişê xo de Newroz Serhate nê vatî: “Dinya şexsê cinîyan ê Kurdan de reyna xoverdayîşê azadîye yê şarê Kurdî rê şahidîye kena. Xoverdayîşê Leyla û embazanê ma, polîtîkayanê serdestan rijneno. Ma do zî bi nê rayraşîyayîşî nê rijnayîşî deşîfre bikerê, xoverdayîşê xo pîl bikerê û Rayberê xo azad bikerê. Senî ke Çîyagerî vat, se beno wa bibo netîce do muhteşem bo!”