Braunschweig de waştişê azadîya Ocalanî ame kerdene

Şaristanê Braunschweigî yê Almanya de seba azadîya Rayberê Şarê Kurdî Abdullah Ocalanî standa zanayîşî ameye akerdene.

Aktîvîstanê înîsîyatîfê ''Free Ocalan'' merkezê şaristanê Braunschweigî yê Almanya de meydanê Kohlmarktî de standêke akerde û waştişê azadîya Ocalanî kerd.

Merkez de xeymêke ronîyaye û pankarta bi nuşteyê ''Seba ciwananê şerkeran, têkoşînê xelisîyayîşî'' ameye daliqnayene. Erdî ser o tarîxê Kurdîstanî bi hawayêkê kronolojîkî bi fotografan û vilawekan ame behskerdene. Binê xeyma stande de zî kitabê Ocalanî, broşur û vilawekî ameyî dayene. Meydanê çalakîye de bi seyan vilawekî ameyî vilakerdene û hemkarîya dewleta tirke û dewleta almane ser o rayaumûmîye reyde zanayîşî ameyî parekerdene. Çalakîkeran bale ante tehlukeyê weşîya Ocalanî û tecrîdê giranî ser. Aktîvîstan waştişê azadîya Ocalanî kerd. Peynîya çalakîye de seba panelê ''Jinwarî'' yê 27ê sibate yê Merkezê Ciwanan (Jugendzentrum Muhle) vengdayîşê tewrbîyayîşî ame kerdene.